Elimizde 7 qańtarda kúshine engen normaǵa qatysty "Ýaqytsha tirkeý" týraly shýǵa Shymkent qalasynyń ákimi Ǵabidolla Ábdirahymov bar-joǵy 50 sekýndta jiylǵan halyqqa túsindirdi, - dep jazady "Ult aqparat" kaz.tengrinews.kz portalyna silteme jasap.
Halyqpen kezekti kezdesýinde sóz sóilegen ákim ýaqytsha tirkeý máselesine qatysty túsinik bergen bolatyn. "Munda másele ýaqytsha turatyn adamdar jaily, myna Jetisaidan kelgender, Maqtaaraldan keldi, Ordabasydan keldi, basqa jerden keldi, Shymkentte kóp adam turyp jatyr. Bizde statistika boiynsha 900 myń adam deimiz. Al shyn máninde qansha? 1 million 200, durys pa? Al biz biýdjetti qaraǵan kezde, myna biz - ákimdik 900 myń adamǵa qaraimyz, avtobýstar 900 myń adamǵa jetsin, aýrýhana 900 myń adamǵa jetýi kerek, al negizinde 1 million 200 adam. Sonda 300 myń adam qaida barady? Olar da bizdiń aýrýhanaǵa barady, olar da bizdiń avtobýsqa minedi. Sonyń barlyǵyn esepteý úshin tirkeý qajet, bul nársege túsinikpen qarańyzdar. Ol álemdegi tártip. Sizder mynaý meniń úiim dep qalai dáleldeisizder? Bul nársege túsinikpen qarańyzdar. Budan úlken problema shyǵarýdyń esh sebebi joq", - dep málimdedi ákim jiynda.
Shymkent ákiminiń bul sózi túsirilgen videony Facebook áleýmettik jelisine jariialaǵan Aigúl Orynbek "Ministrler men depýttar túsindire almaǵan "Tirkeý" jaily zań jobasyn Shymkenttiń əkimi Ǵabidolla jalpaq tilde túsindirip berdi", - dep jazdy.
Al Baqyt Syzdyqova "Ǵabidolla túsindire biledi", - dep pikir qaldyrǵan. Dáýren Maqsuthanuly esimdi qoldanýshy bolsa ákimge riza bolǵanyn jazdy. "Ái, bárekeldi, Ǵabidolla! Qarapaiym jurttyń tilimen túsindirgen eken, mundai ákimder joqtyń-qasy", - deidi ol.
Alaida ýaqytsha tirkeý máselesiniń basqa máselelerine nazar aýdarǵan qoldanýshylar boldy. Máselen, Aijaryq Esali degen qoldanýshy "Túsinbei júrgen joqpyz. Tirkeý kerek ekenin bilemiz. Tek óte saýatsyz, júiesiz, daiyndyqsyz, zorlyqpen júrgizilmesin deimiz. Halyq júieli zańǵa qashanda moiynusynady", - dep jazdy.
Eske salaiyq, 10 qańtarda úkimet otyrysy kezinde premer-ministr Baqytjan Saǵyntaev "Azamattarǵa arnalǵan úkimet" jumysyn synǵa alǵan bolatyn. "Biz "Azamattarǵa arnalǵan úkimetti" qurdyq. Nátijesinde onyń nemen ainalysyp jatqany túsiniksiz. Adamdarǵa onlain rejimde tirkemeitinderińiz jaily aitasyzdar, olai bolsa bul úkimetti nege qurdyq? Eshqandai da jaǵdai jasamasyńyzdar...", - degen edi premer-ministr memlekettik korporatsiianyń tóraǵasy Daniiar Erenshinovke.
Sondai-aq, úkimet basshysy onlain tirkeýge qatysty da syn aitqan edi. "Qyzmettiń bul túri bir ai ishinde júzege asyrylatyn bolady", - degen Daniiar Erenshinovke premer-ministr bir aidan soń halyq arasynda dúrligýdiń azaiatyny, sondyqtan da endi onlain rejimniń qajet bolmai qalatynyn aitqan. Al 17 qańtarda elimizde onlain tirkelý múmkin boldy. Al keiin Daniiar Erenshinovniń otstavkaǵa ketkeni belgili boldy.
