Senator Serik Bekturǵanov azamattardy tirkeýdi uiymdastyrý jáne ótkizý boiynsha jumysty synǵa aldy, - dep habarlaidy "Ult aqparat" Tengrinews.kz portalyna silteme jasap. Ol bul úndeýin úkimet basshysyna joldady.
"Halyqqa qyzmet kórsetý ortalyqtarynyń tirkeý boiynsha jasandy dúrligýinen shoshyp, kóptep kele bastaǵan halyqty qabyldaýǵa daiyn bolmaýy bólek talqylaýdyń taqyryby. Parlamentte talqylaý kezinde zań jobasyn usynǵandar depýtattardyń suraǵyna zańdy oryndaýǵa bailanysty barlyq máseleni sheshýge daiyndyqtyń baryn aityp, jaýap berdi. Olar barlyq deńgeide qaýip-qaterlerdiń aldyn alǵanyn aýyzsha aitýmen boldy. Alaida osy kúnge deiin azamattardyń ýaqytsha tirkeýi máselesinde shalalyqtardy moiyndaýdan basqa tártipti ornatý boiynsha naqty sharalar qabyldanbady", - dep málimdedi senator.
Onyń aitýynsha, bar problemalarǵa jańalary qosylǵan. Osyǵan bailanysty Senat depýtaty úkimetke birqatar eskertýin joldady:
"Zańdy oryndaýǵa jumylýy tiis bolǵan memlekettik organ ókilderin oqytý nelikten óz ýaqytynda júzege asyrylmady. (...) Tirkelmegen jerinde turyp jatqan azamattardy tirkeý máselesin túbegeili tártipke keltirý úshin, budan soń azamattardyń qaýipsizdigi men tynyshtyǵyn qamtamasyz etý úshin nendei sharalar júrgizilmek? Azamattardyń ýaqytsha tirkeýge qatysty quqyqtary men mindetteri týraly qoljetimdi ári túsinikti málimet qashan paida bolady? Buǵan únqaǵazdar, posterler jáne infografikalar da kiredi. Nege "Azamattarǵa arnalǵan úkimet" onlain-tirkeýdi ótkizýge daiyn bolmady?", - deidi depýtat.
"Úkimet áleýmettik jelilerde paida bolyp jatqan jalǵan aqparattarǵa jazalaý-tyiym salý sharalaryn qoldanbai, osy zamanǵa laiyqtalǵan, múddeli organdardyń jedel ári kásibi ádisterimen, múmkin bolyp otyrǵan aqparattyq vakýýmnyń aldyn alyp, saýatty aqparattyq saiasatty qalai júrgizbekshi?", - deidi senator.
Sonymen qatar, ol óz úiinde azamattardy kommýnaldyq qyzmetter tólemimen ýaqytsha tirkegen páter ieleriniń problemalarǵa urynyp qalmaitynyna jazbasha túrde túsinik talap etti.
"Ýaqytsha mekendeý orny boiynsha tirkelgender men baspana ieleri páterde turyp jatqandardyń sanyna qarai eseptelgen kommýnaldyq shyǵyndy tóleý máselesin qalai sheshedi? Kommýnaldyq qyzmetterdi usynatyn arnaiy qyzmetterdiń jumys sapasyn bile otyryp, olardyń azamattardyń ýaqytsha tirkeýinen qosymsha bonýstar alǵysy kelýi múmkin ekenin oilaýymyzǵa quqymyz bar", - dep qorytyndylady Bekturǵanov óz sózin.
