Politseiler ýaqytsha tirkelmegen qazaqstandyqtarǵa naýryz aiynyń ortasynan bastap aiyppul sala bastaidy, - dep habarlaidy "Ult aqparat" Tengrinews.kz portalyna silteme jasap. Bul týraly QR Ishki ister ministrligi Kóshi-qon politsiiasy departamentiniń basshysy Serik Saiynov aitty.
"Búginde premer-ministrdiń barlyq normativtik-quqyqtyq aktileri jazylǵan qaýlysy shyqty. Ol qaýly belgilengen ýaqytta oryndalýy tiis, iaǵni, biyl aqpan aiynda. Aqpan aiynyń sońyna deiin biz qaýlyny bekitýimiz kerek. Zań úkimette bekitilgen soń, ol aqparat quraldarynda jariialanyp, on kúnnen keiin zańdy kúshine enedi. Búginde zańǵa sáikes akt bekitilmeiinshe, bizde ákimshilik zańnamanyń normalary qoldanylmaidy. Sondyqtan naýryz aiynyń ortasyna deiin ýaqytsha tirkeýge turmaǵan qazaqstandyqtar ákimshilik jaýapkershilikke tartylmaidy", - dedi Serik Saiynov.
Onyń aitýynsha, qazaqstandyqtarda HQKO-da nemese "Elektrondyq úkimet" arqyly ýaqytsha tirkeýge turýǵa áli 1,5 ai ýaqyt bar.
Eske sala keteiik, osyǵan deiin QR IIM Kóshi-qon politsiiasy departamentiniń basshysy Serik Saiynov saiajaida turyp jatqandardy tirkeý tártibi týraly aityp bergen bolatyn. IIM ókili úidiń paidalanýǵa berilmegen jaǵdaidaǵy tirkeýge turý týraly suraqqa da jaýap bergen bolatyn. "Úi paidalanýǵa berilmegen bolsa, turǵylyqty orny boiynsha tirkeýge ala alamyz. Sonymen qatar osy máseleni sheshý mehanizmi qarastyrylyp jatyr", - degen edi ol.
Sondai-aq, ol turǵylyqty jer boiynsha tirkeýdiń kóshede tekserilmeitinin aitqan edi.
.jpeg)