Aýa-raiynyń nasharlaýyna bailanysty (kóktaiǵaq, qar aralas jańbyr, qarly boran, kórý múmkindigi shekteýli) TJM jáne Aqmola, Qaraǵandy jáne Pavlodar oblystarynyń TJ departamentinde «Jedel bailanys jelisi» ashyldy, dep habarlaidy "Ult aqparat" vedomstvonyń baspasóz qyzmetine silteme jasap.
TJM: 8 717 2 53 32 84
Aqmola oblysy TJD: 8 716 2 55 14 84
Qaraǵandy oblysy TJD: 8 721 2 51 72 23
Pavlodar oblysy TJD: 8 718 2 20 11 12.
Eske sala keteiik, 7 aqpanda túnnen bastap respýblikalyq «Nur-Sultan-Petropavl» jolynyń jabylýyna bailanysty Nur-Sultan jáne Shýchinsk qalalarynan shyqqan kóptegen kólik jinaldy.
«TJM jáne TJD daǵdarys ortalyǵynda jedel áreket etý jáne vedomstvoaralyq ózara is-qimyldy uiymdastyrý úshin jedel shtab quryldy. Aqmola oblysy TJD jáne Nur-Sultan qalasy TJD «112» pýltine turǵyndardan aqparattyq sipattaǵy 5 500-ge jýyq qońyraý kelip tústi, olar belgilengen tártippen pysyqtaldy.
Azamattardy aýa-raiynyń ózgerýin baqylaýǵa shaqyramyz. Daýyldy eskertý týraly habarlamany tyńdap, qajetti saqtyq sharalaryn saqtańyzdar», deidi TJM resmi ókili Talǵat Ýáli.
Onyń aitýynsha, qysta kólikpen alys jolǵa shyqpas buryn, aýa raiy boljamyna mindetti túrde mán bergen jón.
«Eger qatty boran bolsa, jol keptelisinde uzaq turyp qalýyńyz múmkin. Tipti jol-kólik oqiǵasyna da tap bolýyńyz yqtimal. Eger qandai da bir eldi mekenge shuǵyl barýyńyz kerek bolsa, dittegen jerińizge kedergisiz jetý úshin temirjol kóligin paidalanýǵa keńes beremiz.
Tómende keltirilgen qarapaiym usynymdardy oryndasańyz, boran bolǵan kezde jáne borannan keiin aman qalýǵa kóp septigin tigizedi», dedi ol.
Qysta jolǵa shyǵar aldynda:
Muqiiat aýa raiy boljamyn zerdeleńiz;
Qandai joldar jabylýy múmkin ekenin anyqtańyz.
Aqparatty «Qazavtojol» saitynda tolyǵymen jabyq ýchaskelerdiń kartasynan kórýge bolady. Ne bolmasa, biryńǵai telefon nómiri 1403 nemese qutqarý qyzmetiniń «112» telefon nómiri, sondai-aq «Dármen» mobildi qosymshasy arqyly naqtylaýǵa bolady.
