Kóktemgi tasqyn sý basqan turǵyn úiler. Aqtóbe, 16 sáýir 2017 jyl.
Aqtóbede úilerin sý basyp, evakýatsiialanǵan turǵyndar sany 1174 adamǵa jetti, - dep habarlady búgin Aqtóbe oblystyq tótenshe jaǵdailar departamenti.
Sý basýǵa qatysty ótken brifingte departament bastyǵy Baýyrjan Syzdyqov búgin tańerteńgi saǵat 8-degi málimet boiynsha, barlyǵy 579 úi men aýlany sý basyp, 5 úi qulaǵanyn,1174 adam evakýatsiialanyp, 69 adam qutqarylǵanyn aitty.
Keshe Aqtóbede Elek ózeniniń tasýynan negizinen ózen jaǵalaýyndaǵy saiajai ujymdaryna qarasty júzdegen úidi sý basyp, qalada tótenshe jaǵdai jariialanǵan. Qutqarýshylar Aqtóbedegi taǵy bir ózen - Qarǵaly ózeniniń de tasýy múmkin ekenin eskertken.
Syzdyqovtyń sózine qaraǵanda, qazir ózenderde sý deńgeii kóterilgeni baiqalady. Mysaly, Elek ózeninde sý deńgeii bir táýlikte 60 santimetrge, Qarǵaly ózeninde 72 santimetrge, Sazdy ózeninde 36,5 santimetrge kóterilgen, Jińishke ózeninde sý deńgeii 50 santimetrge túsken.
Evakýatsiialanǵan turǵyndardyń 502-si qaladaǵy mektepterdiń bazasynda uiymdastyrylǵan tórt evakýatsiialyq pýnktke ornalastyrylǵan, 672-si týystarynyń úilerine ornalasqan.
Tótenshe jaǵdailar departamentiniń aqparatyna qaraǵanda, "sý tasý qaýpi bar ózenderdiń tómengi bóligindegi 876 aýlalar habarlanyp, 523 adam evakýatsiialaýdan bas tartqan. Oblys aýmaǵynda sý tasqynyna qarsy 13 shtab qurylyp, sáýirdiń 15-ine deiin turǵyndardan túsken 1834 ótinish boiynsha, 3145 tekshe metr inertti materialdar jetkizilgen, 205,8 myń tekshe metr sý sorylyp, 10050 qap tóselgen".
Qutqarýshylar Aqtóbeniń irgesindegi Kirpishti, Keleshek, Mahambet, Qarǵaly, Zarechnyi-2, Jilianka eldi mekenderindegi jaǵdaidyń áli de kúrdeli ekenin aitady.
