Úkimet basshysy Asqar Mamin keibir naryq qatysýshylarynyń tótenshe jaǵdaidy paidalanyp jatqanyn synǵa aldy, - dep habarlaidy "Ult aqparat".
«Úkimettiń mańyzdy mindeti – eldiń azyq-túlik qaýipsizdigin qamtamasyz etý. Saýda jáne integratsiia ministrligi usynǵan tásilderdi qoldaý qajet dep sanaimyn. Ózderińizge belgili, naryqta, ásirese maýsymaralyq kezeńde birqatar ónimniń baǵasy ósedi. Onyń ishinde áleýmettik mańyzdy azyq-túlik te bar. Statistikaǵa sáikes, 17 naýryz ben 7 sáýir aralyǵynyń ózinde áleýmettik mańyzy bar ónimderdiń baǵasy 4,2 paiyzǵa ósken. Naryq qatysýshylarynyń keibiri tótenshe jaǵdaidy paidalanyp jatyr», - dedi Asqar Mamin Úkimet otyrysynda.
Úkimet basshysynyń aitýynsha, osy sebepti problemaǵa memleket aralasyp, baǵanyń shekti mánin belgilep otyr.
«Bul faktiler halyqty azyq-túlikpen qamtamasyz etýdiń qoldanystaǵy júiesiniń tiimsiz ekenin kórsetti. Osy rette biz azyq-túlik qaýipsizdigin qamtamasyz etý men baǵany baqylaýdyń jańa deńgeiine ótemiz. Úkimet ulttyq taýar ótkizý jelisin, kóterme taratý ortalyqtaryn keshenin qurý boiynsha júieli sheshim qabyldady. Saýda jáne integratsiia ministri Baqyt Sultanov birqatar Eýropa eline baryp, bul turǵydaǵy úzdik tájiribelerdi zerttedi. Zertteý nátijelerin paidalanamyz», - dedi Asqar Mamin.
