Foto: uiymdastyýshylardan
Almatydaǵy oblystyq ortalyq ámbebap kitaphanasynda «Dúniejúzilik kitap jáne avtorlyq quqyqty qorǵaý kúnine» orai «Kitapqa túsken týǵan ólke» atty dóńgelek ústel uiymdastyryldy. Is-sharanyń maqsaty aqyn-jazýshylardyń murasy arqyly týǵan ólkeniń mádenieti men tarihyn, ulttyq bolmysyn urpaqtan urpaqqa nasihattaý, dep habarlaidy Ult.kz.
Dóńgelek ústelde mysaly, Muhtar Áýezovtiń «Abai joly» epopeiasynda Semei óńiriniń kórkem tabiǵatyn, qazaq halqynyń turmysyn, ómir saltyn, ádet-ǵurpyn sheber sýretteýi talqylandy. Sondai-aq Iliias Jansúgirovtiń «Kúi» poemasy arqyly sol óńirdiń tarihi oqiǵalary, adamdardyń minez-qulqy men ózara qatynastaryn da kórsetetinin, Ábish Kekilbaevtyń «Úrker» romanynan týǵan jerdiń tarihyn, ony saqtap qalý úshin kúresken halyqtyń rýhyn uǵynatynymyz, Sábit Muqanovtyń «Botagóz» shyǵarmasynda qazaq halqynyń otbasy qatynastary, jastardyń arasynda bolatyn mahabbat pen ómir súrý qundylyqtary kórinis tabatyny baiandaldy.
Uiymdastyrýshylar sharanyń mańyzdylyǵyna toqtalyp, qazirgidei qarbalas kezeńde oqýshylardyń tarihqa, ata-babalarymyzdyń ǵasyryna kitappen sapar shegý arqyly bilimdi ǵana tolyqtyryp qoimai, olardyń qiial kókjiegin damytatynyn, qiialdyń damýy sheksiz oilaýǵa, al sheksiz oilai alý adamdy kez kelgen salada myqty jetistikterge jetkizetinin aitty. Osy oraida Muhtar Mahaýinniń «Kóshpendiler» trilogiiasy jelisimen túsirilgen, Jetisý jeri sheber kórsetilgen «Qazaq handyǵy: Almas qylysh» kinosy kórsetildi.
Kesh sońynda kitaphananyń «Ádebiet jáne óner» bóliminiń qyzmetkeri Áliia Boranbai:
«Bul tek týǵan jerdiń tabiǵaty men tarihyn sipattaý emes, ol bizdiń rýhani bailyǵymyzdy, ulttyq qundylyqtarymyzdy dáripteý, bolashaq urpaqqa sol qundylyqtardy jetkizýdiń bir joly. Búgingi talqylaý barysynda árqaisymyz týǵan ólkeni tanytýda sóz óneriniń róli qanshalyqty mańyzdy ekenin kórdik. Ádebiet arqyly biz ózimizdiń ata-babamyzdyń júrip ótken joldaryn, olardyń mádenietin, turmysyn jáne áleýmettik jaǵdailaryn tereńirek uǵynyp, sol arqyly rýhani birligimizdi nyǵaitýǵa úles qosamyz. Búgingi dóńgelek ústelimizde sóz bolǵan qalamgerlerdiń shyǵarmalary, olardyń týǵan jerge degen súiispenshiligi men janqiiarlyq eńbegi biz úshin airyqsha qundy. Sol sebepti, kelgenderińizge alǵys bildiremin», – dedi.
