Ońtústik Qazaqstan oblysynyń ákimi Janseiit Túimebaev «Ońtústik» indýstrialdy aimaqta bolyp, ondaǵy birqatar iri kásiporyndardyń jumysymen tanysty. Ondaǵy kásipkerlerge memleket tarapynan kórsetiletin qoldaýlardy atap ótip, óńir ekonomikasynyń damýyna aitarlyqtai úles qosyp otyrǵan isker azamattarmen pikir almasty, dep habarlaidy "Ult aqparat".
Oblys ákimi birinshi kezekte shyny ydystar óndirisimen tanymal «Evrokristall» zaýytynyń jumysymen tanysty. Ondaǵy óndiriletin ónimderdi gazdalǵan sýsyndar men shyryndar, alkogoldik, sút jáne dári-dármekter shyǵaratyn zaýyttar qoldanady. Munda túrli kólemdegi - 200 ml-den 3 litrge deiingi tússiz jáne jasyl tústi bótelkeler men qutylar shyǵarylady. Osynaý ónimderge Qazaqstannyń barlyq aimaǵy men Qyrǵyzstannan tapsyrystar kelip túsýde. Jylyna 60 mln dana shyny shyǵarýǵa qaýqarly óndiris ornynda 150 adam jumyspen qamtylǵan.
Zaýyt jumysymen tanystyrǵan kásiporyn iesi aimaq basshysyna jumys isteý aiasyn keńeitip, kómirqyshqyl gazyn óndirýdi qolǵa alyp jatqanyn jetkizdi. Ol úshin kásipker arnaiy italiialyq qurylǵylardy da satyp alýdy josparlap qoiǵan.
Munan bólek, aimaq basshysy shifer shyǵaratyn kásiporyn «Tectum Enjineering» JShS-ni aralap kórdi.
Shifer óndiretin alǵashqy kásiporyn «Biznestiń jol kartasy - 2020» baǵdarlamasy aiasynda qarjylandyrylǵan. Joba quny 1,9 mlrd teńgeni quraidy. Zaýyt «Hatchek» ádisimen ónim shyǵarady. Munda 200 adam jumyspen qamtylyp, shyǵarylǵan ónimniń 60 paiyzy ishki naryqqa, al qalǵan 40 paiyzy Tájikstan, Aýǵanstan men Ózbekstan elderine jóneltilýde. Zaýyt jylyna 2,3 mln dana shifer óndirý múmkindigine ie.
Indýstrialdy aimaqqa jasaǵan sapary barysynda oblys ákimi «Shymkent Temir» JShS-niń bolat quiý zaýytynyń qurylysymen de tanysty. 2018 jyly iske qosylatyn óndiristiń jalpy quny - 4,2 mlrd teńge. Jylyna 240 myń tonna ónim shyǵarýǵa qaýqarly kásiporyn iske qosylǵanda 150 azamat jumyspen qamtylmaq.
Sondai-aq, ákim shyny óndirisinde sheteldik kompaniialardan kem túspeitin ári sáýlet qurylysynda qoldanýǵa yńǵaily áinek shyǵaratyn «Firma Dana» zaýytynyń ónimimen tanysty. Zaýyt táýligine 1700 sharshy metr áinek shyǵarady. Jańa tehnologiiaǵa negizdelgen shyny qysta úidegi jylýdy saqtasa, jazda bólmedegi temperatýrany birqalypty kúide ustap turady. Bul shynylardyń tiimdiligi jylý ótkizgishtiginde.
Sapar sońynda oblys ákimi Janseiit Túimebaev «Ońtústik» indýstrialdyq aimaǵy óńirdegi aýdan, qalaǵa úlgi bolýy kerektigin aityp, onda ornalasqan kásiporyndardyń jumysyn oń baǵalady.
Aita keteiik, «Ońtústik» indýstrialdy aimaqta jalpy somasy 55,8 mlrd teńge bolatyn bes myń jumys ornyn ashý kózdelgen 85 joba júzege asyrylýda. Búgingi tańda munda quny 21,4 mlrd teńgeniń 46 jobasy iske qosylyp, úsh myń adam jumyspen qamtyldy.
