Ońtústik Qazaqstan oblysy ákimdiginiń kezekti májilisinde aimaq basshysy Janseiit Túimebaev biýdjet qarjysynyń igerilmeýine qatysty basqarma basshylary men aýdan, qala ákimderiniń jumystaryna qanaǵattanarlyqsyz degen baǵa berdi, dep habarlaidy "Ult aqparat" ákimniń baspasóz qyzmetine silteme jasap.
Biýdjet qarajatyn tiimdi jáne merziminde igerý árbir mekeme basshysynyń basty maqsattarynyń biri bolý kerek ekenin aitqan oblys ákimi qazynadan bólingen qarjyny durys uqsatpaǵan basshylar jazalanatynyn jetkizdi.
«Bizdiń osy baǵyttaǵy jumysymyzdy Memleket basshysy men Úkimet qatań baqylaýǵa alǵan. Osyǵan sáikes biz biýdjet qarajatyn igerý máselesin turaqty túrde ai saiyn qarap, talqylaimyz. Alaida, qarjy basqarmasynyń búgin jasaǵan baiandamasyna sáikes, oblystyq basqarmalardyń jáne aýdan, qala ákimderiniń biýdjet qarajatyn igerý baǵytyndaǵy jumystary tómengi deńgeide bolyp otyr. Sonymen qatar, byltyrǵy jyldan beri biýdjet qarajatyn igerý boiynsha berilgen tapsyrmalar oryndalmaǵany belgili boldy. Osy rette, birqatar oblystyq basqarma basshylarynyń jáne aýdan, qala ákimderiniń biýdjet qarajatyn igerý boiynsha jumystaryna qanaǵattanarlyqsyz degen baǵa beremin», - dedi J.Túimebaev.
Májiliste 2017 jylǵy 9 aidyń qorytyndysy boiynsha oblys biýdjetiniń atqarylýy týraly sóz alǵan oblystyq qarjy basqarmasy basshysynyń mindetin atqarýshy R.Múlkemanov oblystyq basqarmalar boiynsha 209,6 mln teńge, al, aýdan, qalalarda 559,4 mln teńge qarjy igerilmei qalǵanyn málimdedi.
«Jalpy jyl basynan beri oblystyq qurylys, energetika, avtomobil joldary jáne kásipkerlik basqarmalary qarjylandyrý josparlaryna 17,1 mlrd. teńgege 25 ret negizsiz ózgerister engizgen. Egerde qyrkúiek aiyndaǵy 4,4 mlrd teńge keiingi ailarǵa aýystyrylmaǵan jaǵdaida atalǵan oblystyq biýdjettik qarjynyń igerý deńgeii tómen bolar edi. Búgingi tańda oblys biýdjetiniń qarjysy 99,8 paiyzǵa igerilip otyr», - dedi R.Múlkemanov.
Baiandamashynyń málimetinshe, eń iri kólemde igerilmegen qarjy Saryaǵash, Sairam aýdandary men Shymkent qalasy jáne oblystyq energetika jáne turǵyn úi-kommýnaldyq sharýashylyq pen dene shynyqtyrý jáne sport basqarmalaryna tiesili eken.
Jiyndy qorytyndylaǵan óńir basshysy J.Túimebaev baiandamadaǵy dáiekterge súiene otyryp, basqarma basshylary men aýdan, qala ákimderine kemshilikterge jol bergen tiisti jaýapty orynbasarlaryna úsh kún ishinde tártiptik shara kórip, nátijesin baiandaýdy jáne aýdan, qala ákimderine osy jyldyń kiris josparyn tolyq oryndalýyn qamtamasyz etýin tapsyrdy.
Sondai-aq, ákim aýdan, qala basshylaryna 2017 jylǵy biýdjette qaralǵan qarjylardy tolyq igerip, túpkilikti nátijege qol jetkizýdi, jyl qorytyndysymen bul jumystar tolyq oryndalmaǵan jaǵdaida birinshi basshylarǵa qatań tártiptik shara kóriletindigin eskertti.
