Óńirdiń damýyna syrtqy investitsiianyń qosar úlesi zor bolýy kerek. Ol úshin aýdan ákimderi kásipkerler men investorlarǵa barlyq tiisti jaǵdailardy jasaýǵa mindetti. Sondai-aq jyl sońyna deiin aiaqtalýy tiis qurylys nysandaryndaǵy jumystardy jyldamdatyp, sapaly ári merzimdi aiaqtaýǵa qol jetkizý qajet. Búgin bul týraly oblystyq ákimdikte ótken selektorlyq otyrysta Ońtústik Qazaqstan oblysynyń ákimi Janseiit Túimebaev málim etti.
Selektorlyq otyrystyń kún tártibinde negizgi úsh másele qaraldy. Onyń alǵashqysy oblystyń 2016-2020 jyldarǵa arnalǵan «Damý» baǵdarlamasy indikatorlarynyń 6 ailyq oryndalýy.
«Oblysqa 180,6 mlrd. teńge investitsiia baǵyttalyp, 2016 jyldyń tiisti kezeńinen 33 paiyzǵa artty. Investitsiia kóleminiń ulǵaiýy Munai óndirý zaýytynyń jańǵyrtý jumystarynyń esebinen oryn alyp otyr. Bul kórsetkish respýblika boiynsha 1- orynda», - dedi oblystyq ekonomika jáne biýdjettik josparlaý basqarmasynyń basshysy Arman Sábitov.
Desek te, birqatar aýdan qala ákimdikterinde tek biýdjettik investitsiialarmen shektelip, jeke investitsiia tartý boiynsha jumystar tómen deńgeide júrgizilýde. Osy máselege naqty mán bergen óńir basshysy aýdan-qala ákimderine tiisti eskerpeler jasap, tapsyrmalar júktedi.
«Aýdan-qala ákimderiniń jumysy osy syrtqy investitsiia tartý kórsetkishterine qarai baǵalanatyn bolady. Jyl sońynda barlyq ákimderdiń jumysy saralanǵanda osy máselege mán beriledi. Sondyqtan qarap otyrmai syrtqy investorlardy qyzyqtyratyn jaqsy jobalardy ázirlep, memleket tarapynan jasalynatyn barlyq jaǵdailardy tiisti deńgeide atqarǵandaryńyz jón», - dedi Janseiit Qanseiituly.
Selektorlyq otyrysta oblystyq qurylys salasy da áńgimege arqaý boldy. 2017 jyly oblys aýmaǵynda oblystyq qurylys jáne aýdan-qala ákimdikteri tapsyrys berýshi bolyp tabylatyn 209 investitsiialyq jobanyń iske asyrylýyna 64,9 mlrd.teńge qaralǵan. Qurylysy josparlanǵan 209 nysannyń, jyl sońyna deiin 116-in paidalanýǵa tapsyrý josparlansa, 93 nysan 2018 jylǵa ótpeli. Osy rette oblystyq bilim basqarmasy basshysynyń mindetin atqarýshy Raýshan Ergashov sóz alyp, aldaǵy qyrkúiekte 20 mektep el igiligine beriletinin aitty.
Al oblystyq densaýlyq saqtaý basqarmasynyń basshysy Muhan Egizbaev bolsa, kúrdeli jáne aǵymdaǵy jóndeýden ótip jatqan nysandardyń barysyn baiandady.
Jiyn barysynda qysqy maýsymǵa daiyndyq barysy da talqylandy. Ásirese, bilim uialary men áleýmettik nysandardyń qysqa ázirligine jiti mán berilýi kerektigi aityldy. Jalpy oblystaǵy 3209 biýdjettik mekemelerden aldyǵy jylý maýsymyna daiyndalǵany 2677-ine qurap otyr.
«Jylý maýsymyna daiyndyq jumystary 25-tamyzǵa deiin tolyq aiaqtalýy kerek. Jylytý maýsymyna qajetti kómir, suiyq otyn, mazýt sekildi qajettilikter osy aidyń sońyna deiin jinaqtalyp, qorda turýy tiis. Bul rette aýdan-qala basshylary men tiisti sala basshylary aptalyq esep berip otyratyn bolady», - dedi J. Túimebaev.
