Qazaqstanda ózderin oppozitsiialyq uiym ataityn Jalpyulttyq sotsial-demokratiialyq partiianyń tóraǵasy Jarmahan Tuiaqbai 26 sáýirde ótken partiia sezinde tóraǵa qyzmetinen ketti, dep habarlaidy Azattyq.
JSDP sezinde aldymen 9 maýsymda ótetin kezekten tys prezident sailaýyna boikot jariialaý týraly sheshim qabyldandy. Budan soń sóz alǵan Tuiaqbai "jastarǵa jol berý kerektigin" aityp, partiia basshylyǵynan ketetinin málimdedi.
Sezd delegattary Tuiaqbaidyń bul usynysyn birden maquldaǵan joq. Úsh qaitara daýysqa salǵan soń ǵana, 39 delegattyń 22-si saiasatkerdiń tóraǵalyqtan ketýin maquldady.
- Basym daýyspen sheshim qabyldandy. Raqmet sizderge, - dedi Tuiaqbai.
Ol partiia tóraǵalyǵyna "Dat" gazetter jobasynyń jetekshisi, jýrnalist Ermurat Bapidi usyndy. Onyń kandidatýrasyn sezd delegattary biraýyzdan qoldady. Tuiaqbai tóraǵalyqtan ketkenimen partiianyń saiasi keńesi múshesi bolyp qaldy.
60 jastaǵy Ermurat Bapi QazUÝ-dy jýrnalistika mamandyǵy boiynsha támamdaǵan. 1990 jyldary "Sotsialistik Qazaqstan" (qazirgi "Egemen Qazaqstan") gazetiniń tilshisi boldy. 1993-1995 jyldary Qazaq radiosy basshysynyń orynbasary qyzmetin atqardy. 1995-1997 jyldary ministrler kabinetiniń baspasóz hatshysy bolyp istegen. 1998 jyly oppozitsiiaǵa ótip, 1998-1999 jyldary prezident sailaýy jaily oppozitsiialyq baǵytta habar taratqan "Dat" gazetin shyǵarýshylardyń biri boldy. "Dat" basylymy birneshe ret jabylyp, keiin jańa ataýmen jumysyn qaita jalǵastyryp otyrdy.
Bapidi JSDP saiasi keńesi biyl ótetin kezekten tys prezident sailaýyna úmitker retinde usynbaq bolǵan. Biraq jýrnalist "2021 jylǵa josparlanǵan parlament sailaýyna daiyndalaiyq" dep, biylǵy sailaýǵa túsýden bas tartty.
Buǵan qosa sezd partiia ataýyn "Aqiqat" JSDP dep ózgertý týraly sheshim qabyldady.
71 jastaǵy Jarmahan Tuiaqbai Qazaqstan bas prokýrory, memlekettik tergeý komitetiniń basshysy, ekinshi shaqyrylymdaǵy májilis tóraǵasy bolyp qyzmet atqarǵan. 2004 jyly ol depýtattyq mandatynan bas tartyp, prezidenttik "Otan" (qazirgi "Nur Otan") partiiasynan shyqqan. 2005 jyly oppozitsiia atynan prezident sailaýyna túsken. Ol sailaýda Nursultan Nazarbaev 91,15 paiyz daýyspen jeńip shyqqan, Tuiaqbaiǵa sailaýshylardyń 6,61 paiyzy daýys bergen.
Bilikke oppozitsiialyq baǵytty ustanatynyn jariialaǵan Jalpyulttyq sotsial-demokratiialyq partiia 2006 jyly kúzde qurylyp, tóraǵalyǵyna Jarmahan Tuiaqbai sailanǵan. 2009 jyly oppozitsiialyq "Naǵyz Aq jol" partiiasymen birigip, kóp uzamai qaita bólingen.
2016 jyly parlament sailaýynda partiia 1,18 paiyz daýys jinap, májiliske ótýge qajetti jeti paiyzdyq mejege jete almaǵan.
