«Otbasy bank» AQ basqarma tóraǵasy Lázzat Ibragimova tutynýshy nesiesin jabý úshin zeinetaqynyń bir bóligin jumsaýǵa ruqsat berilmeitinin málim etti, dep habarlaidy QazAqparat.
Ortalyq kommýnikatsiialar qyzmetiniń alańynda ótken baspasóz máslihatynda tilshiler «Otbasy bank» AQ basqarma tóraǵasyna osy suraqty qoiǵan edi.
«Eger sizdiń bankpen kelisimshartyńyzda qarajat «qaýyrt qajettilikke bailanysty berilip otyr» dep jazylyp tursa da, bizdiń erejelerde mundai qaryzdardy jabý tártibi qarastyrylmaǵan. Tipti úidiń ózi kepildikte tursa da zeinetaqynyń bir bóligin bul maqsatta alýǵa ruqsat berilmeidi. Iaǵni bastapqy kelisimsharttyń ózinde «baspanany nemese jer úidi satyp alý úshin» degen sóz bolýy kerek», - dedi Lázzat Ibragimova.
Onyń aitýynsha zeinataqynyń bir bóligin alý múmkindigine ie bolý úshin azamattarǵa 45 kún beriledi.
«Alaida máselen bir adam úiin satamyn degenimen oilanyp qalyp, bul satyp alýshynyń ýaqytyn alýy múmkin. Álbette adami faktorlar kezdesedi. Osyndai jaǵdaida mynadai jeńildik qarastyrylǵan: 45 kúnnen keiin bul ótinim kúshin joiady. Qarajatty azamattyń BJZQ-daǵy shotyna qaitaramyz. Osydan keiin álgi azamat qaitadan ótinim bere alady», - dedi ol.
Lázzat Ibragimova sonymen qatar keibir azamattar qarajatynyń bir bóligin ipotekaǵa jabýǵa, ekinshi bóligin baýyrynyń shotyna aýdarýǵa jumsaýyna da bolatynyn atap ótti.
«Mundaida BJZQ-men jasalǵan kelisimniń sharttaryna sáikes, biznes protses boiynsha bastabynda bir operatsiiany júrgizemiz. Ony aiaqtaǵannan keiin qalǵan somany baýyryńyzǵa bergińiz keletini jóninde ótinim beresiz. Bul operatsiialar tek birinen keiin biri júrgiziledi», - dedi ol.
