Qaraly oqiǵa barsha jurttyń qabyrǵasyn qaiystyryp ketti. Kóńilge muń, keýdege óksik, janarǵa jas úiirdi. Júrek qanjylap, til bailandy. Bes birdei sábidiń aýyr qazasy eldi eseńiretip, etegin jasqa toltyrdy. Aqyndardyń azaly jyry kókirektegi sher-shemendi aqtaryp, jan dertin qozǵady...
***
Qaida júr dep ata-anamdy sókpeńiz,
Qar ústinde tamaq izdep ketken iz.
Jer betinen jaily oryn taba almai,
Tún ortasy ushyp kettik kókke biz!
Ýaqyt bop, aiyryldyq jas jannan,
Ómirimiz tar bólmede bastalǵan.
Barlyq bala baqytty ómir súrsinshi,
Biz olardy baqylaimyz, aspannan!
Qastaryńda bolsyn daiym anańyz,
Áketaiyń bolsyn daiym panańyz,
Bul ómirden páter kórmei ketsek te,
Ujymaqta záýlim sarai salamyz!
Endi aiazdan eshbir sábi tońbasyn,
Jaýqazyn gúl ashpai jatyp solmasyn,
Urpaǵyńnyń jaryq bolyp mańdaiy,
Otanymda esh jamandyq bolmasyn!
Keńshilik Tyshqanuly
ShAPAǴATShY
...Bul qoǵamnyń unamady-aý bir isi,
(sher shólmegin bosata alar kim iship?!)
Bes Perishte - jasyl qanat bes Sábi,
Kókke ushyp kete bardy tún ishi.
Úrker qaida -
Tóbede me?
Batysta?
Ne joramal - búk túsip bul jatysqa?!
Kete bardy bes Perishte - bes Sábi,
Qala almady jalyn qamap,
Ot ustap.
Jyla, júrek,
Júde, kóńil, oiazyp,
Berer me eken Kún emshegin,
Ai azyq?
Ustap qala almady ǵoi arqanyń
Aq shalmaly aiazy.
Endi oralmas,
Meken bolmas kir ǵalam -
Myń boiaýly dúniesin buldaǵan.
Eske salyp egiltedi bizderdi,
Kúl ornyna ósken raixan gúl ǵana.
Dańǵazaǵa burmas qaita moiynyn,
Eliktirmes "Úishik-úishik" oiyny.
Terezeden jaýtań qaǵyp janarlar,
Tas qaladan izdemeidi meiirim...
Azam -aýyr,
Qaiǵym - qalyń,
Oi - tereń,
Biraq bizdi túsinbeisiń, BÁITEREK...
Butaǵyńa qonaqtaityn balapan,
Aspanǵa aýyp kete barsa qaiter eń?!
Jumaq kirer -
Sarai,
Haýyz,
Kil shaǵyi,
Ertegiler álemindei tumsa kúi.
...alaqanyn jaiyp maǵan talpynyp,
Túsimde ylǵi órtenedi bir Sábi.
Men de muńdy,
Týǵan ólkem jyraqta,
Qansha taǵdyr tamuq keship, júr otta.
Sol Sábidi keýdeme ákep arýlap,
Jýyndyram kózden aqqan bulaqqa...
Bes Perishte támamdalmas sapary,
Shyraq jaǵyp júrer túnge ot alyp.
...Shapaǵatshy bolsyn saǵan Sábiler,
Meniń sorly,
Meniń uly Otanym!
Murat Shaimaran
***
Aq qar, kók muz, aiaz qysar bir jaqtan,
Joqshylyq-ai, baqytymdy urlatqan.
Ot ishinde oianbaǵan qyzdarym -
Júregime salmaq saldy zil batpan...
Qazybek Quttymuratuly
***
Tún. Ana – tsehqa, ákesi ketti STO-ǵa
Órtke orandy bes qyrshyn. Toba! Toba!
Bul qazaqqa bailyǵy jeter edi
Sansyz myilyart ketpese EKSPO-ǵa.
Daraqylyq shashpalyq damyp birge,
Ońdy-soldy pul ketti san itterge.
-Balalarǵa qimaityn qarjy qaida?!
- Qaida bolsyn, ketti ǵoi sammitterge
Shetel úshin ainaldyq soǵym malǵa
Madaq úshin - qyp-qyzyl shyǵyndarǵa
- Áleýmettik salaǵa aqsha bar ma?
- Qaidaǵy aqsha?! Ketti ǵoi forýmdarǵa!
Balaǵa joq. Shoýǵa bar, joldaýǵa bar,
Jalaý bolyp ilingen shulǵaýǵa bar.
Konferentsiia, simpoziým, sezd, jarys,
Taǵy ne bar, solarmen bylǵaýǵa bar.
Kináliniń barsha isi kóktei solsyn,
Ishken asy tamaqtan ótpei qoisyn.
Eldi sorly qylǵannyń qulaǵynan
Qulyn daýsy beseýdiń ketpei qoisyn!
Nurlan Sádir
QYZDARDYŃ QAZASYNA
Ómir degen - ysyraptyń derti me,
Ólim degen - ysyrattyń órti me?..
Bir bólmede bes gúl qatar ósken ed,
Ajal kelip kóz salypty kórkine.
Úi ornynda qaldy kúl men úiindi,
Qairan ǵumyr qyrshynynan qiyldy.
Bes taǵdyrdyń úzilgeni-ai bir túnde,
Zarly daýys jep barady miymdy.
Pana tappai jupar atqan óskinge,
Qorǵan bolmai ótemiz-aý eshkimge.
Bes perishte tátti uiqyda jatty da,
Syimai ketti tirliktegi bes kúnge.
Qapiiada til men jaǵym bailanyp,
Qapalandy qalyń elim qaiǵy alyp.
Jaryq nurdy taratýmen bes júrek,
Janyp turdy bes shyraqqa ainalyp!..
Asylbek Jańbyrbai
***
Úzilip tústi bes tal gúl,
sabaǵynan...
Qan jaýyp tur Arqanyń
qabaǵynan...
Jarymaǵan páterge,
jandarym-ai!
Óter emes túiir dán tamaǵymnan.
Bes gúl berip,
bir úige tókken arai.
Bir páterge zar bolyp ótken qalai?
Perishte bop keldi de, myna ómirge,
Perishte bop ketti, áne, kókke qarai...
Túnde sheshken monshaǵym,
Mundaǵy joq.
Turalamas dúnie, turlaýy joq.
Tal tósekte shyryldap,
balapanym,
Tal besigiń qaldy ǵoi,
Qundaǵy joq.
Jaras Kemeljan
***
Bes tiyndyq quny da joq - bes qurlyq!
Bási báseń, bes qulynshaq - bes kúndik...
Bes Zarlyqty qaidan izdep kettińder?
Bilezigi sailanbaǵan bes Muńlyq...
Astanaǵa qaidan ǵana kep ediń?
Eskegi joq, turǵyndary kemeniń...
Jat jaryqtar janaryńdy sóndirip,
Jelmaia muń-qai jaqtarǵa jónediń?
Qai sózimdi artsam eken ǵazalǵa...
Bes perishte - qol júrmeidi jazarǵa.
Janarynan jas aǵyzyp, egilip
Únsiz qalǵan shyǵar tipti... Ajal da!
Ol jaqta endi - Joldaýlar joq ótirik.
Ákimder joq - ursatuǵyn kekirip
Imandaryń serik bolsyn bes bota,
Qara túnde pyr-pyr ushqan kekilik!
Serik Elikbai
***
Bul ómir kelte kimge?
Pendeler erte ólýde!
Órtengen úidei bolyp,
Ózegim órtenýde.
Úmiti óshken ana,
Baqyttan kesh qala ma?
Aqmolam Bes Juldyzdy
Ainaldy Bes Molaǵa...
Dókeiler - tajal keýde,
Dúnieni bazar deýde.
Aqshany adam jeýde,
Adamdy ajal jeýde.
Qasiret arylmady,
Qasiet tabylmady.
Ajal men adamdardyń,
Toimaidy qaryndary.
Jegender bai bolmai ma,
Jemqorlar tairańdai ma?
Ajalǵa bəribir ǵoi,
Adamdar oilanbai ma?!...
Ershat Qaiboldin
***
Qairan Áke,
ot oranyp ózegiń,
aiaz-qaiǵy qarydy.
Sorly sheshei,
tartyldy ǵoi ózeniń,
Kimge jeter zar úniń?!
Bes balańdy
quryqtady tez ólim,
Qyzǵaldaqtar
qyrshyn qidy tamyryn.
Ajal-oty
erte saldy-aý kezegin,
Qulynshaqtar
qushaqtatty-aý qabirin!
Kim bilipti,
et júrekti ezerin?!
Qairan ákei!
Sorly sheshei!
Qorǵan bolsyn sabyryń!
Merei Qart
***
Astana jaqtan keledi hattar kóńilsiz:
Kún qatty boran deidi, erteń deidi,
Boranǵa kesheginiń derti ólmeidi.
Bolar ma aiaz qatty odan asqan,
Júregiń oǵan nege órtenbeidi?!
Bola almai shyryl únge eshkim qorǵan,
Býdaqtap túnge sińip kóshtiń be arman?!
Bir sharpyp júrekterdi ótti-aý búgin,
Bes səbi -
Bes kún jalǵan.
Aqpannyń aza túni neni uqtyrdyń,
Qandailyq qasiretke jolyqtyrdyń?!
...Kóńilsiz hattar əli kelip jatyr,
Qalshyldap tońyp turmyn...
Asylan Tilegen
***
Kórgen kúnniń ainasy osy dep bil,
Janaryma yzanyń jasy kep tur!
Bar qazaqtyń qaiǵysy bul qasiret,
Ár qazaqtyń qaiǵysy qasiret bul!
Toq uqpaidy qaryny ashty árine,
Ol basqasha álemde, basqa kúide!
Qai qaltaly túnimen nan taýypty,
Besiktegi balasyn tastap úige!
Ailalylar aqyry aq atanyp,
Aiyptaidy álsizdi taǵy aparyp.
Alatyndy alatyn alaiaqtar,
Kóresini kóretin qara halyq!
Esil eldiń boialyp beti qanǵa,
Shendiler júr olarǵa jekip anda!
Bári ǵajap ákimniń esebinde,
Bári ǵajap kógildir ekranda!
Órt sóngenmen, janǵan ot óshpedi ishte,
Taǵy kóndik amalsyz ótken iske.
Jaratýshy jánnattyń tórin bersin,
Keshirińder bizderdi, bes perishte!
Keshirińder bizderdi, bes perishte!
Rahat Ábdirahmanov
