Qazaqstan Respýblikasy Prezidenttigine kandidat Saltanat Tursynbekova Qazaqstandaǵy ana men bala ólimi taqyrybyna arnalǵan jiyn ótkizdi. Jiyn Atyraý qalasynda uiymdastyryldy, dep habarlaidy úmitker shtabynyń baspasóz qyzmeti.
«Ana men bala óliminiń deńgeii – el meditsinasynyń damýyn sipattaityn mańyzdy kórsetkishterdiń biri. Bul kórsetkishter memlekettegi ómir súrý deńgeii týraly da aitady, sodan keiin ol halyqaralyq reitingterde de kórsetiledi. Qazaqstanda bul kórsetkishter burynnan ósip kele jatqanymen, sońǵy ýaqytta asqan jyldamdyqpen óse bastady. Biz árbir áiel men sábi úshin kúresýimiz kerek», - dedi Tursynbekova.
Kandidat ranking.kz derekterine silteme jasai otyryp, birneshe tsifrlardy alǵa tartty.
Ulttyq josparǵa sáikes, ana ólimi 2021 jyly 100 myń tiri týǵanǵa shaqqanda 35-ten tómen bolyp, 2025 jylǵa qarai 10-ǵa deiin tómendeýi kerek. Al, is júzinde 2021 jyly bul kórsetkish 44,7 boldy. Atyraý oblysynda ana óliminiń naqty kórsetkishi kútilgennen úsh esege joǵary boldy.
«Sońǵy ýaqytta balalar ólimi boiynsha nátijeler de kóńil kónshitpeidi. Jyl sońyna deiin Qazaqstanda náreste ólimi 1000 tiri týǵanǵa shaqqanda 7,6-ǵa deiin tómendeýi kerek edi. Alaida, kórsetkish kerisinshe respýblika boiynsha orta eseppen 8,44-ke deiin ósti», - dedi spiker.
Náreste óliminiń jii kezdesetin sebepteri perinataldyq kezeńde týyndaityn jaǵdailar (932 náreste), týa bitken aýytqýlar jii kezdesedi (335 náreste), sondai-aq infektsiialyq jáne parazittik aýrýlardyń da áseri bolady (72 náreste).
«Ana men bala óliminiń aldyn alýǵa basa nazar aýdarylýda. Ol úshin qoǵamdyq uiymdarmen, ǵalymdarmen, sarapshylarmen jańa sheshimderdi talqylaý mańyzdy. Shalǵai eldi mekenderde eńbek etetin áielder úshin qolaily jaǵdai jasaityn tiimdi infraqurylymdy qurý qajet. Feldsherlik-akýsherlik pýnkter men dárigerlik ambýlatoriialardaǵy meditsinalyq kadrlardyń tapshylyǵy máselesin sheshý, osy salalardaǵy meditsinalyq joǵary oqý oryndarynan mamandardy kóptep shyǵarý – búgingi kúnniń talaby. Mundai profildegi dárigerlerdi jaqsy yntalandyryp otyrý kerek», - dep atap ótti quqyq qorǵaýshy.
Eske salaiyq, Saltanat Tursynbekovanyń elimizdiń batysynda úgit-nasihat jumystarymen júrgenine ekinshi kún boldy. Keshe ol Yessenov ýniversitetiniń oqytýshylarymen, stýdentterimen jáne túlekterimen, sondai-aq jalǵyzbasty, áskerge shaqyrylǵandardyń analarymen kezdesýler ótkizdi.
