Foto: Democrat.kz
Dindar Muhamedjan Tazabek qoǵam nazaryna ilikke Tursynbek Qabatov pen Móldir Muqannyń ajyrasýyna qatysty pikir bildirdi dep jazady Ult.kz.
"Tursynbektiń tórinde talai qonaq bop, Móldirdiń qolynan ystyq shái ishýshi edik... Bul kúnder de kózden bulbul ushqany ma?! Bir áiel jylasa aspandy bult torlaǵandai, bir erkektiń eńsesi tússe egindi órt shalǵandai kúige túsemiz.
Sońǵy jyldary, myńdaǵan otbasylardyń muńy men syryna kýá bop júrip túsingenim; eki tulǵany tutas tyńdamai, ishki jaǵdaiǵa etene aralaspai, ol otbasynda oryn alǵan jaǵdaidyń saldaryn eseptemei - eshteńe aitpaý, birdeńe deýge asyqpaý...
Eki jas eki jaqqa ketip, ekeýi eki adammen taǵdyr qosyp, jyldar óte kele qaita qosylǵandy da kórdik….
“Áieldi bylai ustaý kerek qoi” dep, syrttai kúpinip, jyldar óte óz jaryna jarty sózin ótkize almaǵandy da kórdik.
“Kúieýim bir júrgen sorly, bilgenimdi isteimin, aitqanymdy oryndatamyn” dep, abyroiyn jurt aldynda ultaraq qylǵan jeńgeidiń jer ortasyna kelgende “sorly” kúieýiniń jýas bir vahter áieldiń qolyna kirip alǵanyn da kórdik. “Ei, bul, óitpeý kerek edi ǵoi” dep, betti jeńgeidiń sasqannan úsh kún shańyraqqa qarap, tesilip jatqanyna da kýá boldyq…
Aq kóńil jýas áielin basynyp, kúndiz-tún bilgenin jasap, syrttaǵy seriligi sarqylǵanda qoldan qartaitqan báibishesiniń esiginen syǵalap, ortaǵa kisi salyp, baiaǵy kúniniń synyq sátin qaitara almai júrgen kókelerimizdi de kórdik.
Qasynda boldyq, basý aittyq, aiadyq… Ómir ǵoi… Ne bolmai jatyr?! “Ártister-ai, senderdiń ómirleriń kimge kerek?”
“Nege syrlaryńdy syrtqa shashasyńdar, tynysh júre bermeisińder me?”
“Tursynbek-aý, neń bar edi qutyryp, abyroiyń shashyldy ǵoi…” degendei ne degen pikirler legin tógip jatyrmyz…
Ártis bolsa da, tanymal bolsa da osy qoǵamnyń músheleri ǵoi. Bul qubylystar ómirdiń shyndyǵy, qoǵamnyń jasyra almaityn sipattary. Bul kisiler tanymal bolǵasyn syrtqa shyǵyp ketip jatyr. Jazǵyshtarǵa da, blogerlerge de qyzyq taqyryp, jurt nazaryn aýdartar suhbat degendei…
Biraq, qanshama qarapaiym otbasynda shegine jetip, shebinen ótip turǵan problema da osy ǵoi. Túk bolmaǵandai túr jasap, ózi sheshilip ketetindei kóz jumyp júrgen sherli jan qansha ma?!
Álemdik liderler de, prezidentter de, aqylmandar da shyryldap jatyr. “Oibai, adamzat kúrdeli kezeńge kirdi. Sheshilý kún saiyn qiyndap barady. Diplomatiia damymasa, soǵystyń ushqyny lypyldap tur. Tehnologiia aldyǵa qaryshtap ketti, adamnyń tabiǵi sapasyn saqtaýy kún saiyndap qiyndap barady” dep dabyl qaǵýda…
Sol “kúrdeli kezeńniń”, “jańa problemalardyń” alǵashqy qurbandary - dástúrli qoǵamdaǵy otbasy qundylyǵy bop turǵany ókinishti…
Ajyrasý ǵaryshtyq jyldamdyqpen júzege asýda. Ajyrasý nietinde júrgender odan da kóp. Úilenýdi umytqan, turmysqa shyǵýdy qarastyrmaityn jastardyń qalyń nópiri ósip kele jatyr…
Qoǵam qojyrap tur. Sapanyń túskeni sondai - pedofil pedagog, maniak ákeler paida boldy. Týysqa qaryz bermeitin, dosqa syr aitpaityn sýyq, sekemshil, “sen timeseń men time” bolyp baramyz. Babalar saýap alǵan isten biz stress alamyz. Babalar “mal qulaǵy sańyraý” dep qashqan taqyryptardan biz serial túsirip, aqsha jasaimyz.
Bizge qazir súringendi ájýalap, aqylmansyp bireýdiń ústinen úkim aitatyn emes, shyn maǵynasynda shyryldap, shańyraǵyńnyń astynda ósip kele jatqan búldirshinderdiń taǵdyryna alańdaityn ýaqyt kep tur.
“Qyzdarymnyń baǵy ashylmady” degen depýtattyń”, “ulym týraly aitýǵa uialamyn” degen akademiktiń suhbattary bizdi tolǵandyrý kerek…
Eń quryǵynda bireýdi tabalap, sol arqyly basymyzǵa bále shaqyryp almaiyqshy… “Áiel qyryq shyraqty!” Móldirge haiyrly taǵdyr tileimiz.
Bul kúnder de óter. Ýaiymdy umyttyrar qýanysh syilasyn, Jaratqan! Tursynbek te túsiner. Erkek qoi, esin jiyp, týyn túzetip, qolyn túsirmei amanattaryn arqalaýǵa Alla kúsh qýat bersin!
Qiyp jiberetin qyzymyz, qýyp jiberetin ulymyz kóp emes. Az ǵana halyqpyz… Alla saqtasyn! Tynysh kezde tyrtyńdaý, toq kezde tobasyz sóileý ońai. Qudai basqa salmasyn!", - dep jazady Muhamedjan Tazabek óz paraqshasynda.
