فوتو: Democrat.kz
دٸندار مۇحامەدجان تازابەك قوعام نازارىنا ٸلٸككە تۇرسىنبەك قاباتوۆ پەن مٶلدٸر مۇقاننىڭ اجىراسۋىنا قاتىستى پٸكٸر بٸلدٸردٸ دەپ جازادى Ult.kz.
"تۇرسىنبەكتٸڭ تٶرٸندە تالاي قوناق بوپ, مٶلدٸردٸڭ قولىنان ىستىق شەي ٸشۋشٸ ەدٸك... بۇل كٷندەر دە كٶزدەن بۇلبۇل ۇشقانى ما?! بٸر ەيەل جىلاسا اسپاندى بۇلت تورلاعانداي, بٸر ەركەكتٸڭ ەڭسەسٸ تٷسسە ەگٸندٸ ٶرت شالعانداي كٷيگە تٷسەمٸز.
سوڭعى جىلدارى, مىڭداعان وتباسىلاردىڭ مۇڭى مەن سىرىنا كۋە بوپ جٷرٸپ تٷسٸنگەنٸم; ەكٸ تۇلعانى تۇتاس تىڭداماي, ٸشكٸ جاعدايعا ەتەنە ارالاسپاي, ول وتباسىندا ورىن العان جاعدايدىڭ سالدارىن ەسەپتەمەي - ەشتەڭە ايتپاۋ, بٸردەڭە دەۋگە اسىقپاۋ...
ەكٸ جاس ەكٸ جاققا كەتٸپ, ەكەۋٸ ەكٸ اداممەن تاعدىر قوسىپ, جىلدار ٶتە كەلە قايتا قوسىلعاندى دا كٶردٸك….
“ەيەلدٸ بىلاي ۇستاۋ كەرەك قوي” دەپ, سىرتتاي كٷپٸنٸپ, جىلدار ٶتە ٶز جارىنا جارتى سٶزٸن ٶتكٸزە الماعاندى دا كٶردٸك.
“كٷيەۋٸم بٸر جٷرگەن سورلى, بٸلگەنٸمدٸ ٸستەيمٸن, ايتقانىمدى ورىنداتامىن” دەپ, ابىرويىن جۇرت الدىندا ۇلتاراق قىلعان جەڭگەيدٸڭ جەر ورتاسىنا كەلگەندە “سورلى” كٷيەۋٸنٸڭ جۋاس بٸر ۆاحتەر ەيەلدٸڭ قولىنا كٸرٸپ العانىن دا كٶردٸك. “ەي, بۇل, ٶيتپەۋ كەرەك ەدٸ عوي” دەپ, بەتتٸ جەڭگەيدٸڭ ساسقاننان ٷش كٷن شاڭىراققا قاراپ, تەسٸلٸپ جاتقانىنا دا كۋە بولدىق…
اق كٶڭٸل جۋاس ەيەلٸن باسىنىپ, كٷندٸز-تٷن بٸلگەنٸن جاساپ, سىرتتاعى سەرٸلٸگٸ سارقىلعاندا قولدان قارتايتقان بەيبٸشەسٸنٸڭ ەسٸگٸنەن سىعالاپ, ورتاعا كٸسٸ سالىپ, باياعى كٷنٸنٸڭ سىنىق سەتٸن قايتارا الماي جٷرگەن كٶكەلەرٸمٸزدٸ دە كٶردٸك.
قاسىندا بولدىق, باسۋ ايتتىق, ايادىق… ٶمٸر عوي… نە بولماي جاتىر?! “ەرتٸستەر-اي, سەندەردٸڭ ٶمٸرلەرٸڭ كٸمگە كەرەك?”
“نەگە سىرلارىڭدى سىرتقا شاشاسىڭدار, تىنىش جٷرە بەرمەيسٸڭدەر مە?”
“تۇرسىنبەك-اۋ, نەڭ بار ەدٸ قۇتىرىپ, ابىرويىڭ شاشىلدى عوي…” دەگەندەي نە دەگەن پٸكٸرلەر لەگٸن تٶگٸپ جاتىرمىز…
ەرتٸس بولسا دا, تانىمال بولسا دا وسى قوعامنىڭ مٷشەلەرٸ عوي. بۇل قۇبىلىستار ٶمٸردٸڭ شىندىعى, قوعامنىڭ جاسىرا المايتىن سيپاتتارى. بۇل كٸسٸلەر تانىمال بولعاسىن سىرتقا شىعىپ كەتٸپ جاتىر. جازعىشتارعا دا, بلوگەرلەرگە دە قىزىق تاقىرىپ, جۇرت نازارىن اۋدارتار سۇحبات دەگەندەي…
بٸراق, قانشاما قاراپايىم وتباسىندا شەگٸنە جەتٸپ, شەبٸنەن ٶتٸپ تۇرعان پروبلەما دا وسى عوي. تٷك بولماعانداي تٷر جاساپ, ٶزٸ شەشٸلٸپ كەتەتٸندەي كٶز جۇمىپ جٷرگەن شەرلٸ جان قانشا ما?!
ەلەمدٸك ليدەرلەر دە, پرەزيدەنتتەر دە, اقىلماندار دا شىرىلداپ جاتىر. “ويباي, ادامزات كٷردەلٸ كەزەڭگە كٸردٸ. شەشٸلۋ كٷن سايىن قيىنداپ بارادى. ديپلوماتييا دامىماسا, سوعىستىڭ ۇشقىنى لىپىلداپ تۇر. تەحنولوگييا الدىعا قارىشتاپ كەتتٸ, ادامنىڭ تابيعي ساپاسىن ساقتاۋى كٷن سايىنداپ قيىنداپ بارادى” دەپ دابىل قاعۋدا…
سول “كٷردەلٸ كەزەڭنٸڭ”, “جاڭا پروبلەمالاردىڭ” العاشقى قۇرباندارى - دەستٷرلٸ قوعامداعى وتباسى قۇندىلىعى بوپ تۇرعانى ٶكٸنٸشتٸ…
اجىراسۋ عارىشتىق جىلدامدىقپەن جٷزەگە اسۋدا. اجىراسۋ نيەتٸندە جٷرگەندەر ودان دا كٶپ. ٷيلەنۋدٸ ۇمىتقان, تۇرمىسقا شىعۋدى قاراستىرمايتىن جاستاردىڭ قالىڭ نٶپٸرٸ ٶسٸپ كەلە جاتىر…
قوعام قوجىراپ تۇر. ساپانىڭ تٷسكەنٸ سونداي - پەدوفيل پەداگوگ, مانياك ەكەلەر پايدا بولدى. تۋىسقا قارىز بەرمەيتٸن, دوسقا سىر ايتپايتىن سۋىق, سەكەمشٸل, “سەن تيمەسەڭ مەن تيمە” بولىپ بارامىز. بابالار ساۋاپ العان ٸستەن بٸز سترەسس الامىز. بابالار “مال قۇلاعى ساڭىراۋ” دەپ قاشقان تاقىرىپتاردان بٸز سەريال تٷسٸرٸپ, اقشا جاسايمىز.
بٸزگە قازٸر سٷرٸنگەندٸ ەجۋالاپ, اقىلمانسىپ بٸرەۋدٸڭ ٷستٸنەن ٷكٸم ايتاتىن ەمەس, شىن ماعىناسىندا شىرىلداپ, شاڭىراعىڭنىڭ استىندا ٶسٸپ كەلە جاتقان بٷلدٸرشٸندەردٸڭ تاعدىرىنا الاڭدايتىن ۋاقىت كەپ تۇر.
“قىزدارىمنىڭ باعى اشىلمادى” دەگەن دەپۋتاتتىڭ”, “ۇلىم تۋرالى ايتۋعا ۇيالامىن” دەگەن اكادەميكتٸڭ سۇحباتتارى بٸزدٸ تولعاندىرۋ كەرەك…
ەڭ قۇرىعىندا بٸرەۋدٸ تابالاپ, سول ارقىلى باسىمىزعا بەلە شاقىرىپ المايىقشى… “ەيەل قىرىق شىراقتى!” مٶلدٸرگە حايىرلى تاعدىر تٸلەيمٸز.
بۇل كٷندەر دە ٶتەر. ۋايىمدى ۇمىتتىرار قۋانىش سىيلاسىن, جاراتقان! تۇرسىنبەك تە تٷسٸنەر. ەركەك قوي, ەسٸن جيىپ, تۋىن تٷزەتٸپ, قولىن تٷسٸرمەي اماناتتارىن ارقالاۋعا اللا كٷش قۋات بەرسٸن!
قيىپ جٸبەرەتٸن قىزىمىز, قۋىپ جٸبەرەتٸن ۇلىمىز كٶپ ەمەس. از عانا حالىقپىز… اللا ساقتاسىن! تىنىش كەزدە تىرتىڭداۋ, توق كەزدە توباسىز سٶيلەۋ وڭاي. قۇداي باسقا سالماسىن!", - دەپ جازادى مۇحامەدجان تازابەك ٶز پاراقشاسىندا.
