QR Ishki ister ministrligi Qylmystyq atqarý júiesi komitetiniń tóraǵasy Janat Eshmaǵambetov elimizdiń túzeý mekemelerinde koronavirýstyń jańa tolqynyna daiyndyq qalai júrgizilip jatqanyn aitty, dep habarlaidy QazAqparat.
«Tótenshe jaǵdai rejimi jariialanǵan sátten-aq aldymyzda qylmystyq atqarý júiesiniń jabyq mekemelerinde indettiń taralýyna jol bermeý mindeti ótkir turdy. Biz jergilikti atqarýshy organdarmen, azamattyq densaýlyq saqtaý organdarymen birlesip, jedel túrde tiisti jospar ázirledik. Árbir mekeme azamattyq beiindegi meditsinalyq uiymdarǵa bekitildi. Túzeý mekemeleri aýmaǵynda provizorlyq jáne infektsiialyq statsionarlar ashylyp, aýqymdy karantin sharalary ótkizildi. Zalasyzdandyrý sharalary qarqyndy engizilip, antiseptik quraldarmen ǵimaratty tazalaý júrgizildi. Keibir mekemelerdi kazarmalyq jaǵdaiǵa kóshirgen jait ta oryn aldy», - dedi komitet tóraǵasy Ishki ister ministrligi alańynda ótken baspasóz máslihatynda.
Onyń aitýynsha, qyzmetkerler infektsiianyń taralýyna jol bermeý úshin vahtalyq ádispen táýliktep mekeme aýmaǵynan shyqqan joq. Sonyń arqasynda jaǵdai turaqtalyp, sottalýshylardyń jappai aýrýyna jol berilmedi.
«Qazirgi ýaqytta koronavirýstyń jańa tolqynynyń kútilýin eskere otyryp, dárilik zattardyń qajetti qory, meditsinalyq qural-jabdyqtar satyp alyndy. Meditsinalyq kadrlardy da jinaqtap otyrmyz. Olardyń jalaqylaryn jáne eńbek jaǵdailar kóterý máselesi sheshilýde. Qabyldanǵan sharalardyń arasynda biz sanitarlyq-epidemiologiialyq jaǵdaidy baqylaýda ustap tura alamyz», - dedi Janat Eshmaǵambetov.
