«Astana EKSPO - 2017» ulttyq kompaniiasynyń eks-basshysy Talǵat Ermegiiaev biýdjettiń qyrýar qarjysyn jymqyrǵany úshin sottalǵan bolatyn, dep xabarlaidy "Ult aqparat".
QR Bas prokýratýrasy zańdy kúshine engen úkimderdiń zańdylyǵyn jáne oryndalýyn qadaǵalaý qyzmetiniń bastyǵy Qairat Jaqypbaevtyń aitýynsha, Talǵat Ermegiiaevtiń kamerasy barlyq sottalǵandardyń jatatyn oryndarymen birdei bolǵan. Al VIP-kabineti jumys alańynda ashylǵan.
«Ermegiiaevtiń «VIP-kamerasy» bolmaǵan. Túrmede jumys isteitin óndiristik territoriia bar. Dál sol jerde arnaiy kabinet jasaqtaǵan. Sonyń ishinde barlyq jaǵdailar jasaldy. Ermegiiaev jumys ýaqyty kezinde sonda boldy. Sebebi oǵan jeńildikter berildi. Al túnde ol barlyǵymen birdei kamerada jatady», - dedi Q.Jaqypbaev Astanada ótken baspasóz máslixatynda.
Onyń aitýynsha, T.Ermegiiaevke arnaiy jaǵdai jasaǵan barlyq qyzmetkerler jumystan shyǵaryldy. 16 adam jazalandy. Eki adam qyzmetten bosatyldy. «Qylmystyq atqarý júiesiniń basshylary da jazaǵa tartyldy. Osy jaǵdaidan keiin Bas prokýror respýblika boiynsha barlyq túrmelerdi tekserip shyǵýdy tapsyrǵan bolatyn. Biz barlyq mekemelerdi tekserip shyqtyq. Endi, Ermegiiaevtiń «VIP-kabineti» siiaqty zań buzýshylyqtar anyqtalmady. Degenmen, sottalǵandarǵa jeńildik jasaý faktileri bar. Bir jerde uialy telefondy qoldanýǵa ruqsat berdi, endi bir jerde turmystyq texnikany kirgizdi. Sottalǵandar kilem, jihaz jáne taǵy basqa zattardy qoldandy. Sol úshin 26 qyzmetker jaýapqa tartyldy», - dep atap kórsetti Q.Jaqypbaev.
