Qazaqstanǵa Túrkiiadan jalpy salmaǵy 11 tonnadan astam gýmanitarlyq júk jetkizildi, dep habarlaidy "Ult aqparat" «Habar 24» arnasyna silteme jasap.
«Qazaqstan úkimetiniń arnaiy jibergen ushaǵy Túrkiia Respýblikasynan gýmanitarlyq kómek alyp qaitty. «Aidyń nury» qory, Ankara shahary mýnitsipaliteti, Qoja Ahmet Iasaýi ýniversiteti Túrkiia túlekteri birlestigi men osy eldegi qazaq diasporasynyń jinaǵan kómegi de osy kólikke tieldi. Júk salmaǵyna kelsek, mysaly bir ǵana túrik úkimetiniń jibergen júginiń quramynda ókpeni jasandy jeldetýge arnalǵan 30 apparat, PTR-taldaýǵa arnalǵan 2 jabdyq, 200 myńnan astam meditsinalyq preparattar men buiymdar bar», - delingen aqparatta.
Málim etilgendei, bul kómek úkimetaralyq ózara túsinistik memorandýmy aiasynda tegin tartý etildi.
«Qazaqstannyń COVİD-19 indetimen kúresi nátije beredi dep senemiz. Mamandarǵa kúsh-qýat bersin, naýqastarǵa shipa bolsyn. Túrkiia árqashan Qazaqstanmen birge. Sondai-aq bul kómek osy ýaqytqa deiin shetelge jiberilgen eń aýqymdy kómek ekenin aita ketkim keledi. Gýmanitarlyq járdem 6 shildede Erdoǵannyń Elbasy Nursultan Nazarbaevpen telefon arqyly sóileskennen keiin bergen tapsyrmasyna sai uiymdastyrylyp otyr», - deidi Túrkiia syrtqy ister ministriniń orynbasary Iavýz Selim Kyran.
Túrkiiadaǵy qandastarymyz da atajurttaǵy jaǵdaiǵa alańdap, járdem berýge umtyldy. Ony Eýropadaǵy otandastarymyz da qoldap, bir jaǵadan bas, bir jeńnen qol shyǵardy.
«Shet elde ómir súrsek te, júregimiz árqashan otan dep soǵady. Qysyltaiań kezeńde bir-birimizge demeý bolý – biz úshin borysh. Bir apta ishinde shamamen 1 tonnaǵa jýyq meditsinalyq kómek jinadyq. Ony «Otandastar» qory, qajetti azamattarǵa tarqatady, - dedi Katead birlestiginiń tóraǵasy Ertolqyn Gairetýlla.
Sondai- aq Qoja Ahmet Iasaýi Ýniversiteti Túrkiia túlekteri de bilim alǵan elin umytpai, Qazaqstan elshiligine 28 ottegi kontsentratyn tabystady.
«Kenetten kelgen keseldiń keri áseri tórtkúl dúniege qatty tidi. Qazaqstannyń nanyn jedik, sýyn ishtik. Kómek kezek bizde. Bul jihazdardan bólek, Iassaýi Ýniversitetin támamdaǵan dárigerlerdi jibersek deimiz», - dep atap ótti Iassaýi ýniversiteti túlegi Múrat Demirez.
Budan bólek, gýmanitarlyq kómektiń quramynda «Aidyń nury» qorynyń 135 dana ottegi kontsentratory da bar. Apparattar osy reispen jetkizý úshin arnaiy Ystanbuldan Ankaraǵa ákelindi.
