Túrkiianyń Stambýl qalasynda kúres túrlerinen reitingilik «Iashar Dogý» týrniri bastaldy. Birinshi jarys kúninde grek-rim kúresiniń balýandary beldesti, dep habarlaidy Olympic.kz.
55 kelide finalda beldesken Amanǵali Bekbolatov kúmis júldeger atandy. Ol aqtyq synda túrkiialyq Adem Býrak Uzynmen kezdesip, 5:6 esebimen qarsylasqa jol berdi.
Osy salmaqtaǵy Marlan Muqashev qola júlde úshin kúreste qarsylasyna jol berdi.
60 keli salmaqta qazaqstandyq Ernar Fidahmetov top jardy. Ol finalda túrik balýany Ekrem Óztúrkti jeńgen. Ernardyń baýyry Ernur Fidahmetov osy salmaqta qola júldeger atandy.
63 kelide el namysyn qorǵaǵan Aidos Sultanǵali men Ǵalym Qabdynazarov júldege ilikken joq.
67 kelidegi Meiirjan Shermahanbet týrnirdiń qola júldesin jeńip aldy. Ol jartylai finalda norvegiialyq Morten Torrensonnan jeńilgen. Sultan Ásetuly men Daniiar Qalenov alǵashqy ainalymdarda utylǵan.
87 kelidegi Ýmalt Daýdov qola júlde úshin kúreste túrkiialyq balýanǵa ese jiberse, 97 kelidegi Ýmaev ta qola medaldan aiyrylyp qaldy.
