Reseidiń Túrkiiadaǵy elshisi Andrei Karlovtyń ólimine qatysty aiyptalǵan bes adam ómirlik túrme jazasyna kesildi. 9 naýryzda Ankara sotynda aiyptalýshylarǵa úkim oqyldy, dep jazdy Anadolu agenttigi. Diplomat 2016 jyly óner galereiasynda kórmeniń ashylýy kezinde atyp óltirilgen.
Bilik elshini Mevliýt Mert Altyntash esimdi adam tapanshamen atty dep málimdedi. Altyntashtyń ózin arnaiy jasaq oqiǵa kezinde atyp óltirgen. Is boiynsha jalpy 28 aiyptalýshy bar. Altaýy aqtalyp, birnesheýi syrttai sottaldy. Qalǵany túrli merzimde túrme jazasyn aldy.
Tergeý organdarynyń boljamynsha, qylmysty qazir AQSh-ta turyp jatqan yqpaldy dindar Fethýllah Giýlenniń jaqtastary uiymdastyrǵan. Sot tergeý tarabynyń boljamyn qoldady. Buǵan deiin bilik Giýlendi 2016 jyly áskeri tóńkeris jasaýǵa tyrysty dep aiyptap, eldegi myńdaǵan jaqtasyn qamaǵan. Al Giýlen shabýylǵa qatysy joǵyn aitady.
Diplomattyń jesiri Marina Karlova Bi-bi-si saitynyń Orys qyzmetine bergen suhbatynda shabýylǵa deiin kúieýine keminde tórt ret qoqan-loqy jasalǵanyn aitqan. Keiinirek qosymsha kúzetpen qamtamasyz etilgen.
Karlova tergeý oryndary qylmysty ashty, naǵyz uiymdastyrýshylaryn anyqtady dep sanamaidy. "Bul is ashylady dep te sanamaimyn" dedi ol.
