Belgili ánshi ári aktrisa Janar Aijanova ene men kelin arasyndaǵy qarym-qatynas, kúieýbalaǵa degen kózqaras jáne jastardyń ajyrasýy týraly oiyn ortaǵa saldy. Óner iesi otbasyndaǵy tatýlyqty saqtaýdyń ózindik joldaryn aityp, kópshilikke oi saldy, dep habarlaidy ult.kz.
Janar Aijanova «Aitarym bar» podkastynda qazirgi jastardyń ómirge degen kózqarasy burynǵy býynnan ózgeshe ekenin jetkizdi. Onyń sózinshe, jas otbasylarmen til tabysý úshin úlkender de óz ustanymdaryn ózgertip, kei jaǵdaida ikemdilik tanytýy qajet.
Ánshi ásirese enelerdiń kelinmen qarym-qatynasynda sabyr saqtap, eki tarapqa da birdei qaraýy mańyzdy ekenin aitty.
«Qazir jastardyń ómirge kózqarasy basqa. Ańdap sóilep, aqyryn basyp, yńǵailaný kerek. Eneniń saiqal saiasaty bolý kerek. Eki jaqty birdei ustaityn, ózińdi syilatatyn saiasatyń bolǵany jón. Kelin aqsaýsaq bolsa, aqyryndap úiretý kerek. Kúieýbala da sondai, ol da bireýdiń erke balasy. Ony da baýyrǵa tartqan durys. Bári basymnan ótti. Al jastardyń ajyrasyp jatqany — óte qaiǵyly nárse», – dedi óner iesi.
Onyń pikirinshe, otbasyndaǵy túsinispeýshilikterdi ýshyqtyrmai, aqylmen sheshýge umtylý qajet. Ásirese jas jubailardyń arasyndaǵy kelispeýshilikke úlkenderdiń aralasýy jaǵdaidy qiyndatpai, kerisinshe, eki jaqty tatýlastyrýǵa baǵyttalýy tiis.
Janar Aijanova kelinge ǵana talap qoimai, kúieýbalany da óz balańdai qabyldaýdyń mańyzyn atap ótti. Ol jas otbasylardyń ajyrasýyn qoǵamdaǵy alańdatarlyq máselelerdiń biri dep sanaidy.
Ánshiniń sózinshe, otbasynyń berekesin saqtaý úshin tek jastar emes, olardyń ata-analary da ózara syilastyq pen túsinistik tanytýy kerek.
Aita keteiik, buǵan deiin de Janar Aijanova otbasyndaǵy tárbie men jezdeniń róli týraly pikir bildirip, týystar arasyndaǵy syilastyq pen qarym-qatynastyń mańyzyna toqtalǵan edi.
Janar Aijanova kim?
Janar Aijanova – qazaqstandyq ánshi, aktrisa, telejúrgizýshi jáne Qazaqstannyń eńbek sińirgen qairatkeri. Ol 1968 jyly Aqtóbe oblysy Shalqar aýdanynyń Tumalykól aýylynda dúniege kelgen. Bala kezinen án aityp, mekteptegi mádeni is-sharalarǵa belsendi qatysqan. 1985–1986 jyldary Shalqar aýdandyq mádeniet úiinde avtoklýb meńgerýshisi bolyp eńbek etken. 1995 jyly Abai atyndaǵy Qazaq ulttyq pedagogikalyq ýniversitetiniń mýzyka fakýltetin támamdaǵan.
1991–2000 jyldary Súiinbai atyndaǵy Almaty oblystyq filarmoniiasynda jáne “Adyrna” folklorlyq-etnografiialyq ansamblinde óner kórsetken. Qazaqtyń halyq ánderin oryndap, ulttyq mýzykany nasihattaýǵa úles qosqan. 2015 jyly Astanada Qazaq handyǵynyń 550 jyldyǵyna arnalǵan “Tarihy tasqa jazylǵan” atty kontsert ótkizgen. Ánshilikpen qatar akterlik jáne telejúrgizýshilik qyrynan da tanylǵan.
2021 jyly bergen suhbatynda Qazaqstannyń eńbek sińirgen qairatkeri ataǵyn alǵanyn aityp, bul marapattyń ózine úlken jaýapkershilik júkteitinin jetkizgen. Óner iesiniń Aijuldyz esimdi qyzy bar. Janar Aijanova suhbattarynda otbasy qundylyqtary, bala tárbiesi jáne áielderdiń qoǵamdaǵy orny týraly jii pikir bildiredi. 2026 jyly “Momskii áńgime” podkastynda jeke ómiri men ekinshi nekesiniń aiaqtalýy týraly ashyq aitqan. Búginde ol ónerimen qatar qoǵamdyq jáne otbasylyq máselelerge qatysty pikirleri arqyly da kópshilik nazarynda júr.
