Túrkiia áskeri qyzmetkerleri "Islam memleketi" terror uiymynyń jetekshisi ál - Baǵdadidiń ápkesin qolǵa túsirdi. Aqparatty jergilikti aqparat agenttikteri joǵary laýazymdy túrik sheneýnigine siltep taratty.
Bul málimetke qaraǵanda, 65 jastaǵy Rásmiia Avad otbasymen birge Aleppo provintsiiasyndaǵy Azaz qalasyna taiaý jerde turǵyn úige beiimdelgen konteinerde tyǵylyp jatqan. Arnaiy operatsiia barysynda dúisenbi keshke ustalǵan. Onymen birge kúieýi, kelini jáne bes balasy qamaýǵa alynǵan.
- Barlaýǵa taptyrmas derek. Onyń "Islam memleketi" týraly biletinderi bul uiym jaily túsinigimizdi áldeqaida keńeitýi múmkin, - deidi derekkóz.
"Islam memleketi" terror uiymynyń basshysy Ábý Bákir ál - Baǵdadi ótken aida AQSh áskeriniń arnaiy operatsiiasy barysynda ózin - ózi jaryp jibergen. Osy reid kezinde "Islam memleketi" týraly mańyzdy aqparattary bolýy múmkin qujattar tabylǵan.
