Ankara prokýratýrasy Qyrǵyzstandaǵy "Sapat" bilim berý mekemeleriniń negizin qalaýshy Orhan Inandyny 15 jyldan 22,5 jylǵa deiin bas bostandyǵynan aiyrýdy surady. Bul týraly "Anadolý" aqparat agenttigi habarlady.
Basylym málimeti boiynsha, Inandy "qarýly terrorlyq uiym basqarýǵa" aiyptalyp, prokýratýra aiyptaý qorytyndysyn sotqa tapsyrǵan.
Inandy kóp jyldan beri Qyrǵyzstanda turyp, 2012 jyly azamattyq alǵan. Ol biyl 1 maýsymda Bishkekte joǵalyp ketken. 5 shildede Túrkiia prezidenti Rejep Taiyp Erdoǵan arnaiy qyzmet ókilderiniń ony Ankaraǵa alyp kelgenin moiyndady.
Qyrǵyzstan prezidenti Sadyr Japarov Orhan Inandyny qaitarýdy Ankaradan talap etetinin málimdegen. Al Qyrǵyzstan Ulttyq qaýipsizdik komitetiniń tóraǵasy Kamchybek Tashiev Orhan Inandy qyrǵyz azamattyǵyn alǵan kezde, túrik azamattyǵynan bas tartpaǵanyn jetkizgen.
