Túrkiia syrtqy ister ministri qazaqstandyq jýrnalisti "Fethýlla Gúlenniń tilinde sóiledi" dep saýalyna jaýap berýden bas tartty, dep habarlady Azattyq tilshisi.
Astanada ótken Siriia boiynsha kelissózde Kazakhstan.kz saitynyń tilshisi Baǵlan Omarov Túrkiia syrtqy ister ministri Mevliýt Chavýshoglýǵa túrik tilinde suraq qoiǵan.
- Siriianyń Afrin aimaǵyndaǵy "Záitún sabaǵy" operatsiiasy másesi úsh ministr kezdesýinde qozǵaldy ma, osy operatsiia qanshalyqty zańdy? degen suraq qoidym. Ekinshi suraǵym Shveitsariia men Túrkiia arasyndaǵy diplomatiialyq daǵdarysqa qatysty boldy. Túrkiialyq eki diplomat taiaýd Shveitsariianyń eki azamatyn alyp qashqysy kelip, daý týyndaǵan. Mevliýt Chavýshoglý maǵan seni tanymaimyn, "FETO-nyń tilinde sóilegendikten suraǵyńa jaýap bermeimin, seni tanymaimyn" dep qysqa qaiyrdy. Ankara Fethýlla Gúlenniń FETO uiymyn terrorlyq uiym dep jariialap, tyiym salǵan, - dedi jýrnalist.
Qaitar aiynda Ankara Siriiamen shekaradaǵy Afrin aimaǵynda turatyn kúrdterge qarsy áýe jáne qurlyqtan shabýyl bastaǵan. Aqpanda Túrkiia áskerileri Siriianyń Idlib provintsiiasyna jaqyn jerde besinshi áskeri bekettiń qurylysy bastalǵanyn málimdegen. Túrkiia Siriia prezidenti Bashar Asad pen islamshyl jasaqtar arasyndaǵy qaqtyǵysty azaitý maqsatynda, Idlib pen basqa da provintsiialarda 12 baqylaý beketin salý jóninde Máskeý jáne Tegeranmen kelisken.
Túrik biligi 2016 jylǵy memlekettik tóńkeris jasaýǵa tyrysty dep AQSh-ta júrgen Fethýllah Gúlendi aiyptaidy. 2016 jyldyń jazynan beri Túrkiiada 110 myńnan astam adam qyzmetten bosatylǵan nemese alastatylǵan. Gúlenmen bailanysta bolǵan degen kúdikpen 50 myńnan astam qamaýǵa alynǵan.
240 adam qaza tapqan memlekettik tóńkeris talpynysyna Gúlen óziniń qatysy bolmaǵandyǵyn aitady. Erdoǵan biligi Gúlen qozǵalysy qaldyǵyna tótep berý úshin repressiia qajet dep sanaidy. Quqyqqorǵaýshylar bolsa, tóńkeris talpynysyn Erdoǵan basqasha oilaityndardy tunshyqtyrýǵa ilik etip paidalanyp otyr dep sanaidy.
