Taýly Qarabaqtaǵy atysty toqtatý rejiminiń monitoringi negizindegi Birlesken baqylaý ortalyǵy qyzmetiniń tehnikalyq aspektilerine sai Resei tarapy júrgizgen kelissózderdiń qorytyndysy boiynsha tiisti hattamaǵa qol qoiyldy, dep habarlaidy Anadoly túrik aqparat agenttigi.
Bul týraly búgin Túrkiianyń Ulttyq qorǵanys ministrliginiń Twitter paraqshasynda jazyldy. Hattamada Qarabaq boiynsha Birlesken Ortalyqtyń negizderi men printsipteri jazylǵan. Túrkiia men Reseidiń Birikken ortalyǵynyń jumysyn bastaý úshin qajetti sharalar atqarylyp jatyr.
Birlesken baqylaý ortalyǵyn qurý týraly kelisimge 11 qarashada Túrkiia men Reseidiń qorǵanys vedomstvolarynyń basshylary Hýlýsi Akar men Sergei Shoigý qol qoidy. Ár elden Taýly Qarabaqtaǵy atysty toqtatý rejimin baqylaý boiynsha Birlesken ortalyq qyzmetkerleriniń sany teń bolady. Bul týraly seisenbide Resei qorǵanys ministrliginiń resmi ókili Igor Konashenkov málimdedi, dep jazady TASS.
Onyń aitýynsha, atalǵan ortalyq Ázerbaijan aimaǵynda ornalasady.
«Ortalyqta jumys isteitin Resei jáne Túrkiia sarbazdarynyń sany teń bolady», - deidi áskeri vedomstvanyń resmi ókili.
Konashenkovtyń aitýynsha, Reseidiń bitimgershilik kontingentiniń áskeri qyzmetshileri Stepanakerttegi Zorge kóshesi jáne Shýsha - Lisogorskii baǵytyndaǵy gaz qubyry men elektr jetkizý jelisin jarylǵysh zattardan tazartqanyn aitty.
«Bir táýlik ishinde 5 gektardan astam aýmaq, eki shaqyrym jol tazartylyp, 109 jarylǵysh zat tabyldy jáne olar arnaiy jabdyqtalǵan poligonǵa jetkizilip, joiyldy», - deidi ol.
Sondai-aq, ol Taýly Qarabaqtaǵy injenerlik bólimder 34 gektardan astam jer, 12 shaqyrymǵa jýyq joldy tazarqanyn, 110-nan astam úi men áleýmettik nysandar tekserilip, 1077 jarylǵysh zat tabylyp, zalalsyzdandyrylǵanyn aitty.
Sonymen qatar, Reseidiń bitimgershilik kúshteri Taýly Qarabaqtaǵy mańyzdy injenerlik kommýnikatsiialardy qalpyna keltirýde jóndeý brigadalaryna kómek kórsetýde, al Reseidiń qorǵanys ministrliginiń arnaiy maqsattaǵy meditsinalyq bólimshesiniń áskeri dáriger-mamandarynyń toby mamandandyrylǵan meditsinalyq kómek kórsetedi. Reseidiń bitimgershilik kúshteri men Halyqaralyq Qyzyl Krest komitetiniń úilestirýimen qurban bolǵandardyń denelerin izdeý jáne almasý jumystary jalǵasýda.
