AQSh prezidenti Donald Tramp Amerika áskerin Siriianyń soltústik-shyǵys aýdanynan shyǵarý jaily aita kele olardy úiine qaitarý kerektigin málimdedi.
Tramptyń sózine qaraǵanda «Islam memleketi» ekstremistik toptarynyń qolǵa túsken tutqyndarynyń ári qaraiǵy taǵdyryn Túrkiia men Eýropa elderi ózderi sheshýi tiis.
Tramp ózine Túrkiia unamaityndai áreket jasaityn bolsa, onda Túrkiia ekonomikasyn talqandaitynyn málimdedi:
«Buǵan deiin de kesip aitqan edim, taǵy da qaitalaiyn: eger Túrkiia birdeńeni búldiretin bolsa, ózimniń uly jáne teńdessiz danalyǵymǵa qaramastan muny shekten shyǵý dep qabyldap, Túrkiia ekonomikasyn tolyǵymen kúiretip, joq qylamyn (buryn da solai istegenmin!)
Tramptyń qarsylastary Siriianyń soltústik-shyǵys aýdandarynan AQSh áskerin alyp ketse, Siriia demokratiialyq kúshteri men AQSh-tyń odaqtastary qiyn jaǵdaida qalady, «Islam memleketi» sodyrlarymen kúreske qaýip tónedi dep sanaidy.
«Amerika daýysynyń» jazýynsha, ádette Trampty qoldaityn respýblikashyl senator Lindsi Grem Fox News-ke bergen suqbatynda Tramptyń Siriia jónindegi sheshimin aiyptai sóilegen. Tramptyń áreketi Irannyń, Siriia prezidenti Bashar Asad pen «Islam memleketiniń» úlken jeńiske jetkenin bildiredi dep sanaitynyn aitqan.
Tramp "AQSh qazirdiń ózinde «Islam memleketiniń halifatyn» jeńdi, sóitip áldekimder kútkendegiden áldeqaida zor jumys istedi" dep málimdedi.
AQSh prezidenti «Resei men Qytai Vashingtonnyń Siriia tóńiregindegi qarýly qaqtyǵystan shyqqanyn qalamaidy, óitkeni olar AQSh-tyń bitpeitin soǵysqa belshesinen batyp júre bergenin durys kóredi» dep málimdedi.
Tramp 6 qazanda Túrkiia prezidentimen telefon arqyly sóilesken. Osydan keiin Tramp Siriianyń soltústiginde áskeri operatsiia júrgizgisi keletin Redjep Erdoǵandy qoldamaitynyn jariialaǵan. Tramptyń sózine qaraǵanda, AQSh áskeri ol operatsiiaǵa qatyspaidy.
