Túrkistan qalasy adami áleýetti damytý bólimine qarasty №28 mektep-litseiiniń oqýshylary Túrkiianyń Antaliia qalasynan jeńispen oraldy, dep habarlaidy «Ult aqparat» oblys ákimdiginiń baspasóz qyzmetine silteme jasap.
«XIV INTERNATIONAL OLYMPIAD IN ANTALYA» dep atalatyn Halyqaralyq olimpiada 2009 jyldan beri mektep oqýshylarynyń arasynda jaratylystaný baǵytyndaǵy pánderden ótetin bilim jarysy. Dodanyń basty maqsaty – úzdik bilim men tájiribe, shynaiy daryn ielerin taný jáne tabysqa jetý jolyna serpin berý.
Osy jyly qatysýshylar sany da aitarlyqtai kóp bolǵan. Shahardaǵy №28 mektep-litseiiniń direktory Lázzat Nysanqulova men direktordyń oqý isi jónindegi orynbasary Aigúl Abaiqyzynyń jetekshiligimen barǵan oqýshylar ózderiniń shyn júirik ekendikterin kórsete bildi.
«Baiqaý qorytyndysy boiynsha 6-synyp oqýshylary Symbat Smailova men Altaiyr Narimanov orys tili páni boiynsha júldeli 1 jáne 3-oryndardy qanjyǵasyna bailady. Aǵylshyn tili páni boiynsha 6-synyp oqýshysy Janasyl Jandosuly 2-orynǵa laiyq dep tanyldy. Júzden júirik shyqqan 9-synyp oqýshysy Abdýálim Daýletalin «Mister Olimpiada» nominatsiiasyna ie boldy. Al, geografiia páninen komandalyq jarysta júldeli 1-oryndy jeńip aldy», – dedi Túrkistan qalasy adami áleýetti damytý bóliminiń basshysy Orazkúl Shaihyqyzy.
Jarysta 5 memleketten 56 mektep oqýshylary ózara básekege tústi. Sonymen qatar osy bilim jarysyn uiymdastyrýshy tarappen bailanysty nyǵaitý maqsatynda Lázzat Janalyqyzy arnaýly memorondýmǵa qol qoiylǵanyn qýanyshty túrde jetkizdi.
Aita keteiik, atalǵan bilim ordasynda 1500-ge jýyq oqýshy bar. Bilim oshaǵynda úzdik ustazdar ujymy toptasyp qana qoimai, oblysta, tipti respýblika kólemindegi bilim básekelerinde úzdik nátijelerge qol jetkizip keledi. Mektep oqýshylary da aýyz toltyryp aitarlyqtai belesterdi baǵyndyrýda.
