Elbasy Joldaýyndaǵy eńbek naryǵyn damytý boiynsha qolǵa alynǵan baǵdarlama aiasynda túrkistandyq 60-tan astam otbasy Soltústik óńirge qonys aýdarýǵa niet bildirip otyr, dep habarlaidy "Ult aqparat" OQO ákiminiń baspasóz qyzmetine silteme jasap.
Jumys kúshi mol oblystardan jumys kúshi tapshy aimaqtarǵa jumysshy tobyn tartý maqsatynda jýyrda soltústik óńirden arnaiy delegatsiia kelip, túrkistandyq turǵyndarmen jeke-dara kezdesýler ótkizdi. Nátijesinde, kóship-qoný kezindegi járdemaqylardyń der kezinde tólenetinine jáne jumyspen qamtylyp, baspanaly bolatynyna kóz jetkizgen 60-tan astam otbasy qonys aýdarýǵa niet bildirgen.
Túrkistan qalalyq jumyspen qamtýdy úilestirý jáne áleýmettik baǵdarlamalar bóliminiń aitýynsha, búgingi tańda 27 adam, onyń ishinde 10 adam meditsina salasy boiynsha, 5 adam bilim salasy boiynsha, qalǵandary traktorist-mehanizator, aýyl sharýashylyǵy salasy boiynsha ótinish bildirip otyr eken.
Qonys aýdarýshylarǵa múmkindik zor. Qyzmettik turǵyn úi bolmaǵan jaǵdaida azamattyń kommýnaldyq tólemderi men basqa da shyǵyndary óteledi. Sýbsidiia kólemi Ekibastuz qalasyna baratyndarǵa 25 ailyq eseptik kórsetkishpen eseptelse, Jelezinsk aýdanynda 40 myń teńge kóleminde. Arnaiy kelisimge sáikes, 5 jyl boiy búkil qajettilikter qamtamasyz etiledi.
«Osy baǵdarlama aiasynda biz bul otbasylarǵa 35 ailyq eseptik kórsetkish stavkasy boiynsha sýbsidiia usynamyz. Ol ár otbasy múshesine 79000 teńgeden degen sóz. Sondai-aq qyzmettik turǵyn oryn nemese úi beriledi»,-dedi Ekibastuz qalalyq jumyspen qamtýdy úilestirý jáne áleýmettik baǵdarlamalar bólimi basshysynyń orynbasary D.Qurymbaeva.
Aita keteiik, Soltústik aimaqta dárigerler men feldsherler tapshy. Sonymen qatar, pedagogtar men al aýyl sharýashylyǵy mamandary: mehanizator, traktorist syndy jumysshy tapqa da suranys joǵary.
