Túrkistan oblysyna kelgen ziialy qaýym ókilderi birqatar ózekti máselelerdi talqylap, óńirdiń mádenieti, rýhaniiaty men bilim salalaryna qatysty usynys-pikirlerin ortaǵa saldy, dep habarlaidy "Ult aqparat".
Keleli keńeste týrizm salalary men óner, qazaq tiliniń búgingi ahýaly áńgime arqaýyna ainaldy. Túrkistanda «Abai mektebi» men jazýshylar qaýymy arqa súieitin orda ashylýy kerek degen pikir bildirildi. Sansyz baptar mekeni Sairamnyń tyń qupiialaryn ashyp, tylsym tarihyn zertteý usynyldy. Ziialy qaýym Túrkistandy ýaqyt talaby qajet etetin ulttyq kodtan aýytqymai otyryp damytý jaiyn aitty. Tarih ǵylymdarynyń doktory, professor Jambyl Artyqbaev Saýrandaǵy kóneden qalǵan káriz joldary jaily sóz etti. Áli kúnge deiin saqtalǵan aýmaqty qaita jandandyryp, ádemi dúniege ainaldyrýdy usyndy. Bul kárizdi Úndistannan ákelingen quldar nemese irandyqtar jasaǵan, degen boljam bar.
«Ystyq ólkelerde qashan da káriz qudyqtary paidalanylǵan. Káriz aýylynan shyǵar jerde Alańbulaq degen bulaq bar. Alańbulaqtan Túrkistanǵa deiin onshaqty qudyqtyń izi jatyr. Sý Alańbulaqqa deiin kelip Túrkistanǵa jerasty joldarymen jetken.
«Túrkistan jaýgershilik zamanda qalai qorǵandy» desek, osy sýdyń arqasynda qorǵanyp otyrǵan. Aýyldyń Káriz atanyp ketkeni de sodan bolǵan. Kárizge jaýapty adamdar da bolǵan. Mine bul da bir Túrkistannyń erekshe qupiialarynyń biri», - dedi Jambyl Omaruly.
Óz kezeginde Sáken Qalqamanov barlyq usynystardy nazarǵa alatynyn jetkzdi. Ziialy qaýym ókilderine qurmet kórsetip, syi-siiapat jasady. Qonaqtar sondai-aq, «Alataý media-ortalyǵyn» aralap, Túrkistan tórinde ornatylǵan hakim Abaidyń jańa eskertkishine bardy. Uly aqyn músininiń ereksheligine joǵary baǵasyn berdi.
