Túrkistan qalasynyń ákimdigi, prokýratýra men eńbek inspektsiiasy «Aqjol» JShS jumysshylarynyń jalaqy ala almaý máselesi boiynsha tekseris aiaqtalǵany jóninde baspasóz konferentsiiasyn ótkizdi.
«Aqjol» JShS-da 752 jumyskerdiń aldynda osy jyldyń naýryz, sáýir jáne mamyr ailary úshin jalpy somasy 232 mln 449 myń teńge jalaqydan qaryz oryn alǵany anyqtalǵanyn aitty. «Aq-jol» JShS-i QR ÁQBtK-niń 87-baby 1-tarmaǵyna sáikes, ákimshilik jaýapkershilikke tartyldy. Tekserý qorytyndysy boiynsha «Aq-jol» JShS-i basshysy atyna QR Eńbek zańnamasynyń buzýshylyqtaryn joiý boiynsha oryndalýy mindetti nusqama berilgen. Nusqama talabyn oryndatý boiynsha basqarma tarapynan jumys júrgizilýde», dedi Túrkistan oblystyq eńbek inspektsiiasy jónindegi basqarma basshysynyń m.a. Asqar Seitqazin.
Túrkistan qalasynyń ákimi Nurbol Turashbekovtyń málimetinshe, «Aqjol» JShS 2017 jyldan beri qosalqy merdiger retinde qala aýmaǵyndaǵy birneshe qurylys jumystaryna qatysyp kelgen. 2021 jyly Qoja Ahmet Iasaýi atyndaǵy HQTÝ tas jolynan Otyrar móltek aýdanyna baratyn joldyń kúrdeli jóndeý nysanyna qatysty qazirgi tańda sot protsesi júrýine bailanysty qala ákimdigi tarapynan qarjy aýdarylmaǵan. Sot aiaqtalǵan soń, sheshimine sáikes tólemder júrgiziletin bolady», dedi.
«Aqjol» JShS jumysshylaryna jalaqy tólei almaýynyń negizgi kreditorlyq bereshegi - qurylys materialdary qunynyń ósýimen nemese joǵaryda atalǵan JShS-ń merdiger nemese qosalqy merdiger bolǵan jeke kompaniialarmen bailanysty týyndaǵan.
«Kóterilip otyrǵan máselede de «Aqjol» JShS bas merdiger emes, qosalqy merdiger retinde jumystar júrgizgen. Aldaǵy ýaqytta seriktestik ózderiniń atqarǵan jumystaryn bas merdigerge tolyqqandy dáleldep bergen jaǵdaida aitylǵan somanyń barlyǵy tólenedi. Bas merdiger men qosalqy merdiger arasyndaǵy máselege aralasý ákimdik quzyryna kirmeidi. Atalǵan másele sotqa deiingi retteý tártibimen nemese ekonomikalyq sotta sheshilýge tiis. Mitingiler men sherýler mundai máselelerdi sheshpeidi», dedi qala ákimi.
Qalanyń bas prokýrory Jannur Ahmetbek kez kelgen jumys berýshi jumysshylardyń eńbekaqysyn zańmen kózdelgen merzimde tolyq tóleýge mindetti ekenin aityp, «Jumys berýshiniń jalaqy tóleýde bireýge silteme jasap, jaltarýǵa quqy joq», dedi.
Brifing barysynda bas merdiger «Capital Construction Projects Kazahkstan» JShS-i ókili Baqytjan Esaliev «Aq-jol» JShS-nen 190 mln.teńgege oryndalǵan jumystardy salystyryp tekserýge qol jetkize almaǵanyn jetkizdi.
Al ákimshilik ǵimarattardyń biriniń bas merdigeri - "Kontinent Tranzit" kompaniiasynyń ókili Abdýǵani Abdýkadyr "Aqjol" JShS qosalqy merdigeri ózine alǵan mindettemelerin oryndamaǵanyn jáne qurylys jumystaryn aiaqtamai ketip qalǵanyn, onymen qoimai bas merdigerden 150 mln teńge talap etip otyrǵanyn aityp otyr.
