Túrkistanda túrki əlemindegi jalpy bilim beretin oqý oryndarynyń 6-11-synyp oqýshylary arasynda «Iasaýitaný» Halyqaralyq baiqaýy ótti. Igi sharany «Túrkistan - túrki áleminiń mádeni astanasy» jylyna orai QR Mədeniet jáne sport ministrligi men «Áziret Sultan» memlekettik tarihi-mádeni qoryq-mýzeii uiymdastyrdy, dep habarlaidy Ult.kz tilshisi QazAqparat agenttigine silteme jasap.
Bilim jáne óner saiysynyń maqsaty- Qoja Ahmet Iasaýidiń rýhani murasy men ilimin, «Áziret Sultan» kesenesine jerlengen dara tulǵalardyń eli úshin atqarǵan eńbekterin nasihattaý boldy. Sondai-aq Túrkistan qalasynyń tarihy men Ámir Temir dáýirinen qalǵan qundy ortaǵasyrlyq jádigerlerdi jáne mýzei isin keńinen tanystyrý kózdelgen.
Halyqaralyq qazaq-túrik ýniversitetiniń Mádeniet saraiynda ótken baiqaýǵa Qazaqstan, Túrkiia, Ózbekstan jáne Qyrǵyzstan elderinen úzdik oqityn 42 oqýshy qatysyp, bilimderin sarapqa saldy. Eki kezeńnen turatyn saiysta jasóspirimder Qoja Ahmet Iasaýi hikmetterin jatqa aityp, onyń ómiri men shyǵarmalaryna qatysty suraqtarǵa jaýap berdi.
Iasaýidiń hikmetterindegi uǵymdar men rýhani meken-tarihi kesene jəne ondaǵy jádigerler týraly aityp berdi. Saiys qortyndysynda bas júldeni Ońtústik Qazaqstan oblysynyń mektep oqýshysy Ajar Qaramanǵa buiyrdy. Al, birinshi oryndy Aqmola oblysynan kelgen Janat Oqa ielense, ekinshi oryn Qyzylorda qalasynyń qatysýshysy Nursultan Aqypbaev pen Ońtústik Qazaqstan oblysynyń oqýshysy Roza Seitqulova laiyq dep tanyldy. Úshinshi oryndy túrkistandyq Roza Hakimova men Diiara Majitovalar jeńip aldy. Barsha qatysýshylar men jeńimpazdar jəne olardyń jetekshileri arnaiy alǵys hattar men aqshalai, zattai syilyqtarmen marapattaldy.
Aita keteiik, dástúrli túrde ótetin baiqaý biyl halyqaralyq dərejede júzege asyryldy. Óskeleń urpaqty óz tarihyn, mədeni muralary men ǵumyrlyq eskertkishterin tolyq uǵynyp, qurmetpen qaraýǵa shaqyratyn shara aldaǵy ýaqytta da aýqymdy túrde ótkiziletin dep josparlanyp otyr.
