3 maýsymda Túrkistan oblystyq politsiia departamenti shahardaǵy bazarlardyń birinde destrýktivti dini aǵym ókilderi ustalǵanyn habarlady, dep jazady Azattyq.
Túrkistan oblystyq politsiia departamentiniń baspasóz hatshysy Saltanat Qarakózovanyń aitýynsha, departamenttiń ekstremizmge qarsy is-qimyl basqarmasy men arnaiy jasaq úsh kúdiktini qaladaǵy bazarlardyń birinen uialy telefondardy alyp-satatyn jáne jóndeitin orynnan ustaǵan.
"Olar urlanǵan uialy telefondarǵa arnaiy destrýktivti aǵymdy nasihattaityn málimetterdi júktep, satqan" deidi Qarakózova.
Kúdiktilerdiń ústinen Qylmystyq kodekstiń "Áleýmettik, ulttyq, rýlyq, násildik, tektik-toptyq nemese dini alaýyzdyqty qozdyrý" babymen is qozǵalǵan. Olar ýaqytsha qamaýǵa alynǵan. Aiǵaqty zattar alynyp, birneshe saraptama taǵaiyndalǵan.
Halyqaralyq uiymdar Qazaqstan dini nanym-senimge kóp shekteý qoiady dep synaidy. AQSh-tyń dini erkindik jónindegi komissiiasy (USCIRF) Halyqaralyq dini bostandyq jaily 2018 jylǵa arnalǵan esebinde "Qazaqstan úkimeti islamnyń sýnnit aǵymyn, hanafi mazhabyn qoldaidy. Al islamnyń basqa aǵymdaryna kúdikpen qaraidy" dep jazdy.
