Túrkistan qalasynda Qazaqstan Respýblikasy Parlamenti Májilisi Áleýmettik - mádeni damý komitetiniń «Tarihi-mádeni murany qorǵaý men keńinen tanytýdy zańnamalyq turǵydan qamtamasyz etý» taqyrybyndaǵy kóshpeli otyrysy ótti, dep habarlaidy "Ult aqparat".
Otyrys jumysyna QR Parlamenti Májilisiniń depýtattary - Áleýmettik-mádeni damý komitetiniń músheleri men Túrkistan oblysynyń ákimi Janseiit Túmebaev, memlekettik organdardyń qyzmetkerleri men qoǵam, mádeniet, arheologiia uiymdarynyń ókilderi, sarapshylar jáne Q.A.Iasaýi atyndaǵy Halyqaralyq qazaq-túrik ýniversiteti men Qazaqstannyń basqa da joǵary oqý oryndarynyń ǵalymdary qatysty.
Kóshpeli otyrysta tarihi-mádeni murany qorǵaý men ony keńinen tanytýdy zańnamalyq turǵydan qamtamasyz etý máseleleri qaraldy. «Tarihi-mádeni mura obektilerin qorǵaý jáne paidalaný týraly» jáne «Qazaqstan Respýblikasynyń keibir zańnamalyq aktilerine tarihi-mádeni mura máseleleri boiynsha ózgerister men tolyqtyrýlar engizý týraly» Qazaqstan Respýblikasynyń Zań jobalary talqylandy.
Zań jobalarynda tarihi-mádeni mura obektilerin anyqtaý men olardy esepke alý, tarihi-mádeni saraptama júrgizý men nysandardy qujattandyrý máselelerine erekshe nazar aýdarylǵan. Depýtattar jáne Komitet otyrysyna qatysýshylar búgingi tańda kóptegen jańadan anyqtalǵan tarihi jáne mádeniet eskertkishteri mártebesi berilgen obektilerdiń saqtalýy jetkilikti deńgeide qamtamasyz etilmeitinin atap kórsetti.
Máselen, elimizde 25 myńnan astam tarihi-mádeni mura obektileri bar bolsa, olardyń 11 myńǵa jýyǵyna tarih jáne mádeniet eskertkishteri mártebesi berilgen. Bul nysandar búginde tiimdi paidalanýdy, utymdy basqarýdy jáne olardy saqtaý men qorǵaý boiynsha zań, ákimshilik sharalardy qamtamasyz etýdi talap etetin jalpyulttyq mádeni bailyq bolyp tabylady.
