Túrkistan qalasynda «25 qazan – Respýblika kúni. Keshe. Búgin. Erteń» atty dóńgelek ústel ótti. Bul týraly Túrkistan oblysynyń Óńirlik kommýnikatsiialar qyzmeti habarlady.
Keleli basqosýda Respýblika kúni merekesiniń mán-mańyzy, elimizdiń táýelsizdik jyldardaǵy negizgi jetistikteri, qoǵamda turaqtylyqty saqtaýǵa baǵyttalǵan máseleler talqylandy.
Jiynǵa ǵalymdar, úkimettik emes uiym músheleri, memlekettik organdardyń, etnomádeni birlestikterdiń, jastar qanatynyń ókilderi qatysty.
Kezdesýde alǵash bolyp sóz alǵan Túrkistan oblysy qoǵamdyq damý basqarmasynyń basshysy Ańsar Óserbaev Qazaqstannyń egemendigi týraly deklaratsiia táýelsizdikke qarai jasalǵan alǵashqy qadam ekenin, onyń qabyldanýy elimiz úshin oń ózgerister ákelgenin jetkizdi.
«Biyl Prezidentimizdiń bastamasymen 25 qazan – Respýblika kúni ulttyq mereke retinde atalyp ótiledi. Dál osy kúni 1990 jyly Qazaqstannyń egemendigi týraly Deklaratsiia qabyldandy. Babalarymyz úsh ǵasyr armandaǵan táýelsizdik qujat retinde tirkeldi. Osy deklaratsiianyń arqasynda elimizdiń jeke territoriiasy, halyqaralyq qatynastardaǵy derbestigi, memlekettik rámizderi bekitildi. Respýblika kúni osyndai tarihi qundylyǵymen baǵaly», – dedi Ańsar Jańabaiuly.
Basqarma basshysy sondai-aq biyl oblysta Respýblika kúnin atap ótýde eldik pen birlikti dáripteitin qaiyrymdylyq, ekologiialyq jáne patriottyq aktsiialarǵa basymdyq berilip otyrǵanyn jetkizdi. Bul rette, ulttyq merekeniń tujyrymdamasy negizinde Túrkistan oblysynda 30 is-sharadan turatyn jospar bekitilgen. Mereke aiasynda aýdan, qalalarda ótetin 1200-den astam shara josparlanyp otyr. Sonymen birge mereke qarsańynda Túrkistan óńirinde jańa áleýmettik nysandar el igiligine tapsyrylady. Munyń barlyǵy merekeniń mańyzyn arttyrýǵa baǵyttalǵan.
Sondai-aq jiynda sóz alǵan QR Prezidentiniń janyndaǵy Memlekettik basqarý akademiiasynyń Túrkistan oblysy boiynsha filialynyń direktory Ainur Idrisova 25 qazandy Jańa Qazaqstan qurý jolyndaǵy mańyzdy kún dep atap ótti.
«Sońǵy 13 jyldan beri eleýsiz qalǵan ataýly kúndi, el Prezidenti qaita jańǵyrtty. Elimizdiń táýelsizdigi rasymen de osy kúnnen bastaý alady. Sondyqtan, bul kúnniń ulttyq mereke retinde bekitilýi táýelsizdik tuǵyryn asqaqtata túsetin mańyzdy qadam. Bul merekeni tarihymyzdy, dástúrimiz ben tilimizdi, qundylyqtarmyzdy dáripteý dep qabyldaýymyz kerek», – dedi ol.
Jiyndy qorytyndylaǵan basqarma basshysy qatysýshylardy Respýblika kúni merekesimen quttyqtap, eldik pen birliktiń jolynda kúsh biriktirip, elge qyzmet ete berýge shaqyrdy.
