Túrkistanda belgisiz adam meshittiń aldynda tapa-taltúste jas qyzǵa zorlyq kórsetti. Ol kieli jerge duǵa etýge kelgen boijetkendi uryp-soǵyp, uialy telefony men altyn buiymdaryn tonap ketken, - dep habarlaidy NUR.KZ portalynyń óńirlik tilshisi.
Sumdyq jaǵdai 4-shi qyrkúiek kúni saǵat on ekiler shamasynda bolǵan. Belgisiz azamat Qoja Ahmet Iassaýi kesenesiniń mańynda boijetkenniń uialy telefonyn julyp alyp, qashyp ketken. Osy kezde boijetken urynyń artynan uzaq júgiripti. Aqyry sharshaǵan soń, artqa qaitar jolda telefonyn alyp qashqan jigit jas qyzdy saiǵa qarai súirep, aram oiyn iske asyrǵan.
"Men telefonmen sóilesip kele jatqam. Osy kezde bireý telefonymdy julyp áketti. Urynyń artynan júgirip sharshap kettim. Keiin artqa qarai júrip bara jatqan kezimde, ury jigit meni saiǵa qarai súirep ketti. Sol jerde uryp-soǵyp, sheshindirip tastady", - dep jylap jiberdi zorlyq kórgen boijetken.
Bet aýzy qanǵa boialǵan qyzdy kórgen kýágerler birden jedál járdem shaqyrtqan. Aýrýhanaǵa jetkizilgen jábirlenýshige dárigerler alǵashqy meditsinalyq kómek kórsetip, bet-aýzyn tigip berdi. Oqiǵa ornyna kelgen politseiler tekserý jumystaryn júrgizýde. Tapa-taltúste meshittiń aldynda jas qyzǵa zorlyq kórsetken azamat izdestirilýde.
