Túrkistanda qazaqtyń áigili aqyny Maǵjan Jumabaevtyń eskertkishi ashyldy. Aqynnyń óz atymen atalatyn №15 mektep-gimnaziiasynyń aldynda boi kótergen tas músinniń ashylý saltanatyna qala ákimi Álipbek Óserbaev men ádebiet synshysy Qulbek Ergóbek, maǵjantanýshy-jazýshy Jarasbai Súleimenov pen zań ǵylymdarynyń doktory, professor Beket Turǵaraev, Jazýshylar odaǵy tóraǵasynyń orynbasary Maraltai Raiymbekuly jáne birqatar ziialy qaýym ókilderi qatysty, dep habarlaidy Ult.kz tilshisi QazAqparat agenttigine silteme jasap.
Sharada sóz alǵan qala basshysy igi iske muryndyq bolǵan jandarǵa barasha túrkistandyqtar atynan alǵys bildirip, atalmysh sharany rýhani jańǵyrý jolyndaǵy qarymdy qadam bep baǵalady. Sondai-aq, uly aqynnyń esimimen atalatyn mektep-gimnaziiasyna jańa ǵimarat salynǵanyn, onyń materialdyq-tehnikalyq bazasynyń jańǵyrtylǵanyn jetkizdi. Budan soń «Soltústik Qazaqstan» gazetiniń bas redaktory, maǵjantanýshy-jazýshy Jarasbai Súleimenov bul igi sharanyń mańyzynyń ereksheligin aita kele, Maǵjannyń jalyndy jyrlarynyń eshqashan óshpeitinin tilge tiek etti. Sondai-aq, ol Soltústik Qazaqstan oblysy ákiminiń atynan mektepke kompiýterlik synyby syiǵa tartylǵanyn da atap ótti. Belgili zańger Beket Turǵaraev bolsa keler jyly aqynnyń týǵanyna 125 jyl tolý merekesine orai mektep ujymyna Maǵjan jyrlaryn jatqa aitýdan baiqaý ótkizý jaiyndaǵy usynysyn jetkizdi. Al, demeýshilikti óz moinyna alatyndyǵyn aitty. Jiynda belgili ánshi-sazger Saýranbek Eleýov Maǵjannyń «Túrkistan» óleńine jazǵan patriottyq rýhtaǵy ánin oryndasa, Maǵjan Jumabaev mektep-gimnaziiasynyń shákirtteri aqyn óleńderin úsh tilde jatqa aityp berdi.
Aita keteiik, atalǵan eskertkishtiń bas demeýshisi «Ońtústik Jaryq» kommýnaldyq mekemesiniń prezidenti Nábi Aitjanov bolsa, músinniń avtory Qazaqstan Sýretshiler odaǵynyń múshesi, professor Azat Baiarlin.
