Túrkistan qalasynda qazaqtyń uly aqyny Abaidyń 175 jyldyǵy men uly oishyl Ábý Nasyr ál-Farabidiń 1150 jyldyq mereitoiyna orai eńseli eskertkishter ornatyldy. Saltanatty rásimge QR Memlekettik hatshysy Qyrymbek Kósherbaev, QR Premer-ministriniń orynbasary Eraly Toǵjanov pen Túrkistan oblysynyń ákimi Ómirzaq Shókeev qatysty, dep habarlaidy "Ult aqparat".
Abai Qunanbaiulynyń tas músini shahardaǵy «Oqýshylar saraiy» ǵimaratynyń aldyna qoiyldy. Al, álemniń ekinshi ustazy atanǵan Ábý Nasyr ál-Farabidiń eskertkishi jańa oblystyq drama teatry aldynan boi kóterdi.
Demeýshiler esebinen jasalǵan eki eskertkishtiń de avtory – músinshi Gúlfiia Meldesh. Ultymyzdyń uly tulǵalarynyń músinderi monýmentaldy stilde jasalǵan. Qoladan quiylǵan qos eskertkishtiń biiktigi - 4 metr, salmaǵy - 1,5 tonna. 3,5 metrlik tuǵyrǵa ornatylǵan.
Eskertkishterdiń saltanatty ashylý rásiminde sóz alǵan Memlekettik hatshy Qyrymbek Kósherbaev qasietti qaladaǵy is-sharany uly dalanyń ulaǵatty tulǵalaryna taǵzym etý maqsatynda atqarylyp jatqan igi iske balady.
«Elbasy Nursultan Nazarbaevtyń bastamasymen, Memleket basshysy Qasym - Jomart Toqaevtyń qoldaýymen Túrkistan derbes oblys retinde órkendep, tarihi shahar jasaryp, jańarýda. Túrkistan bar qazaqtyń basyn qosyp, el bolyp bátýa jasaǵan tarihi alqap. Osy eki rýhani tulǵaǵa arnalǵan eskertkishterdiń rýhani astanamyz Túrkistanda turýy árine zańdylyq, árine qajettilik. Óitkeni bul eskertkishter - jańa táýelsizdik zamanynda bizdiń rýhani jańǵyrýymyzǵa qoldaýshy ári kýáger bolady degen úmitten shyqqan niet, shara», – dedi Memlekettik hatshy.
Al oblys ákimi Ómirzaq Shókeev órkeniet kóshindegi áigili oishyldardyń mereitoiy qatar kelgen biylǵy jyldyń elimiz úshin eleýli jylǵa ainalýyn atap ótti.
«Biz bul toilardy Memleket basshysy aitqandai, ysyrapshyldyqpen emes, ynsap pen tálim-tárbieniń tóńireginde atap ótýdemiz. Bul – durys sheshim. Biylǵy jyldyń aýyr bolǵanyna qaramastan biz ult rýhaniiatyna bereri mol, rýhani-mádeni baǵyttaǵy birshama jumystar atqardyq. Eleýli eńbektiń biri – búgingi tuǵyrǵa qonǵan babalarymyzdyń beinesi. Abai men Ábý Nasyr ál-Farabi eskertkishteri jańarǵan Túrkistannyń ómirsheń kelbetin qalyptastyrýǵa oń yńpalyn tigizedi, dep senemin», – dedi Ómirzaq Shókeev.
Aita keteiik, Memlekettik hatshy Qyrymbek Kósherbaev bastaǵan arnaiy delegatsiia sondai-aq, Otyrar aýdanyndaǵy qaita jóndeýden ótken Ál-Farabi estertkishi men «Dańqty babalar saiajoly» alleiasynda boldy.
