Foto: QR ǴJBM
Túrkistanda «Woosong University Kazakhstan» ýniversitetiniń saltanatty ashylýy ótti, dep habarlaidy Ult.kz.
Jańa joǵary oqý ornynyń ashylýy – Qazaqstan men Koreia Respýblikasy arasyndaǵy bilim jáne ǵylym salasyndaǵy strategiialyq yntymaqtastyqty tereńdetýdiń mańyzdy qadamy.
Is-sharaǵa QR Premer-ministriniń orynbasary Ermek Kósherbaev, Koreia Respýblikasynyń Qazaqstandaǵy Tótenshe jáne Ókiletti Elshisi Chjo Te Ik, QR Ǵylym jáne joǵary bilim ministri Saiasat Nurbek, Túrkistan oblysynyń ákimi Nuralhan Kósherov, sondai-aq «Výsong bilim qorynyń» Qurmetti tóraǵasy jáne basqarma múshesi Kim Son Kiong myrza qatysyp, quttyqtaý sóz sóiledi.
QR Premer-ministriniń orynbasary Ermek Kósherbaev óz sózinde filial ashýdyń tarihi mańyzdylyǵyna toqtaldy:
«Qazaqstan Respýblikasynyń Prezidenti Qasym-Jomart Kemeluly Toqaevtyń tapsyrmasy boiynsha elimizde jetekshi sheteldik joǵary oqý oryndarynyń filialdaryn ashý jumystary júrgizilip jatyr. Qazirgi ýaqytta ártúrli formatta 40 strategiialyq áriptestik iske asyrylyp, onyń 33-i – sheteldik ýniversitet filialdary. Búgin biz tarihi oqiǵanyń kýási bolyp otyrmyz – rýhani bai ári kóne Túrkistan qalasynda Koreia Respýblikasynyń jetekshi ýniversitetiniń filialy ashyldy. Bul ýniversitet tek bilim berý alańy ǵana emes, halyqaralyq yntymaqtastyq, innovatsiialar ortalyǵy jáne elimizdiń intellektýaldyq kapitalyn qalyptastyratyn joǵary bilikti mamandar daiarlaityn meken bolady», – dep atap ótti vitse-premer.
QR Ǵylym jáne joǵary bilim ministri Saiasat Nurbek Qazaqstannyń Ortalyq Aziiadaǵy jetekshi bilim berý habyna ainalýyna baǵyttalǵan jobalardyń mańyzdylyǵyn atap ótip, sheteldik joǵary oqý oryndarynyń elimizde filialdar ashýy osy strategiialyq maqsatqa jetýdiń mańyzdy bóligi ekenin aitty. Ministr atap ótkendei, jańa oqý jylynda esigin aiqara ashqan «Woosong University Kazakhstan» – osyndai tabysty seriktestiktiń jarqyn úlgisi.
Foto: QR ǴJBM
Memleket basshysy Qasym-Jomart Kemeluly Toqaevtyń tapsyrmasy boiynsha Úkimet halyqaralyq bilim berý yntymaqtastyǵyn damytý, sheteldik ýniversitet filialdaryn ashý jáne stýdentter men oqytýshylardyń akademiialyq utqyrlyǵyn qamtamasyz etý baǵytynda júieli jumystar júrgizip otyr. Aita keteiik, Memleket basshysy Qasym-Jomart Toqaevtyń tapsyrmasy aiasynda Qorqyt Ata atyndaǵy Qyzylorda ýniversitetinde SeoulTech-pen birlesip Jasandy intellekt institýty ashyldy. Búginde Qazaqstan tarapy SeoulTech, Woosong, Dong-Eui, KAIST siiaqty jetekshi koreialyq ýniversitettermen tyǵyz yntymaqtastyq ornatyp, elimizde alǵashqy sheteldik filialdar men ǵylymi-zertteý ortalyqtaryn ashyp, qos diplomdy baǵdarlamalar men akademiialyq almasý jobalaryn iske asyryp jatyr.
Saltanatty is-shara barysynda «Woosong University Kazakhstan» direktory Hva Chon Ion ýniversitettiń missiiasy, negizgi bilim berý baǵdarlamalary, ǵylymi baǵyttary jáne halyqaralyq seriktestikteri týraly keńinen baiandady.
Shara aiasynda qurmetti qonaqtar ýniversitettiń «Tilekter kitabyna» qol qoiyp, jańa oqý ornynyń tsifrlyq kitaphanasy, oqý zaldary men zamanaýi aýditoriialarymen tanysty. Sondai-aq stýdenttermen kezdesip, olardyń alǵashqy oqý kúnderine sáttilik tiledi.
