Búgin Halyqaralyq Túrki akademiiasy Túrkistan qalasynda Qoja Ahmet Iasaýi atyndaǵy Halyqaralyq qazaq-túrik ýniversitetimen birlesip, «Túrkistan – túrki áleminiń rýhani astanasy» atty halyqaralyq konferentsiia ótkizdi. Konferentsiiaǵa qatysýshylar aldymen Ahmet Iasaýi kesenesine arnaiy baryp, taǵzym etti, dep habarlaidy "Ult aqparat".
Alqaly jiynǵa Halyqaralyq Túrki akademiiasynyń prezidenti Darhan Qydyráli, TÚRKSOI uiymynyń Bas hatshysy Dúisen Qaseiinov, Túrki keńesi Bas hatshysynyń orynbasary Ómer Kojaman, Qoja Ahmet Iasaýi atyndaǵy Halyqaralyq qazaq-túrik ýniversitetiniń rektory Janar Temirbekova qatysty.
Sondai-aq, Qazaqstan Respýblikasy Syrtqy ister ministrliginiń Erekshe tapsyrmalar jónindegi elshisi Erjan Muqashev, Qazaqstan Respýblikasy Aqparat jáne qoǵamdyq damý ministrligi Din isteri komitetiniń tóraǵasy Erjan Núkejanov, Túrkiia Respýblikasynyń Almaty qalasyndaǵy Bas konsýly Ali Riza Akyndjy, «Bilge Túrik» mádeniet qorynyń basqarma tóraǵasy, eks-gýbernator Gýngór Azim Týna, Túrkistan oblysy ákiminiń orynbasary Sáken Qalqamanov, sonymen qatar ziialy qaýym ókilderi men tanymal ǵalymdar shaqyryldy.
Basqosý aiasynda Qarahan memleketi dáýirinde (H ǵasyr) kóne túrki tiline aýdarylǵan alǵashqy Quran kitabynyń tusaýkeser rásimi jasaldy.
Halyqaralyq Túrki akademiiasy basyp shyǵarǵan bul biregei basylym bizdiń zamanymyzǵa jetken Quran aýdarmasynyń eń kóne ári tolyq nusqasy sanalady.
Búginde bul qoljazba Ystanbul qalasyndaǵy Túrik jáne Islam óneri mýzeiinde saqtaýly tur.
Túrkistan topyraǵynda týyp, jetilgen ǵulamalar sýsyndaǵan myńjyldyq mura osylaisha túrkologiia, til dáne din máselelerine qyzyǵýshylyq tanytatyn ǵalymdar men izdenýshilerge qoljetimdi bolyp, tolyq faksimile nusqasynda tuńǵysh ret jariialanyp otyr.
Qasietti kitaptyń jaryq kórýi Túrkistannyń túrki áleminiń rýhani astanasy atanýymen tupa-tus keldi.
Keleli keńeske qatysýshylar Elbasy bastamasymen qaita túlegen Túrkistan jáne onyń túrki álemindegi mańyzy týraly oilaryn ortaǵa salyp, baýyrlas elderdiń birligi jaiynda paiymdy pikirlerimen bólisti.
Basqosýdan keiin mártbeli meimandar túgel túrkiniń tóri sanalatyn Túrkistan qalasyndaǵy tarihi oryndardy aralap, jańadan boi kótergen ǵimarattarmen tanysty.
Aita ketý kerek, biyl 31 naýryzda Qazaqstan Respýblikasynyń Prezidenti Qasym-Jomart Toqaevtyń tóraǵalyǵymen ótken Túrki keńesiniń beiresmi sammitinde Túrkistan qalasyn túrki áleminiń rýhani astanasy dep jariialanǵan bolatyn.
