Túrkistan qalasynda «Túrkistan - Túrki áleminiń mádeni astanasy» jyly aiasynda halyqaralyq «Altyn saqa» animatsiialyq filmder festivali ótýde.
Túrki memleketteriniń dostastyǵy kúnine orai uiymdastyrylǵan sharaǵa Qyrǵyzstan, Ózbekstan, Túrkiia, Ázerbaijan, Iakýtiia, Altai, Bashqurtstan jáne Qazaqstan Respýblikasynyń animatorlary qatysty, dep habarlaidy Ult.kz tilshisi QazAqparat agenttigine silteme jasap.
Elbasy N.Á.Nazarbaevtyń «Bolashaqqa baǵdar: rýhani jańǵyrý» atty maqalasy negizinde uiymdastyrylǵan fetivaldi QR Mádeniet jáne sport ministrliginiń teatr jáne kinematografiia bóliminiń bas sarapshysy Gúlnafis Myrzasheva men oblystyq mədeniet basqarmasy basshysynyń mindetin atqarýshy Ǵaliia Sharafieva quttyqtaý sózben ashyp, oblys ákimi Janseiit Túimebaevtyń jyly lebizin jetkizdi. Aýqymdy shara túrkitildes memleketter arasyndaǵy mádeniet pen óner yntymaqtastyǵy jáne dostastyǵyn nyǵaitatynyn atap ótti. Animatsiialyq filmder arqyly balalar men jasóspirimderdi patriottyq rýhta tárbieleý men ulttyq salt-dástúrdi urpaqtan-urpaqqa jetkizý, túrki memleketteriniń animatsiia salasyndaǵy shyǵarmashylyǵyn keńinen nasihattaý men álemdik keńistikke shyǵý jáne halyqaralyq qarym-qatynasty arttyrý festivaldiń basty maqsattarynyń biri dep aityp ótti.
Festival barysynda animatorlar ózara is-tájiribe almasýǵa, sheberlik sabaqtaryn ótkizýge ýaǵdalasty. Oǵan arnaiy kelgen animatorlar kórermender men qazylar alqasyna patriottyq rýhty kóterýge arnalǵan 21 filmdi usyndy. Budan keiin túrki elderinen jinalǵan kino salasynyń mamandary Halyqaralyq Qazaq-Túrik ýniversitetiniń stýdentterimen kezdesip, oi-pikir almasty. Basqosý barysynda kino túsirý, daýys tańdaý syndy kóptegen pikirler ortaǵa salynyp, sheberlik sabaqtary júrgizildi. Sondai-aq festivaldiń qazylar alqasy jergilikti BAQ ókilderine baspasóz máslihatyn ótkizdi. Onda aitýly sharanyń min-mańyzy jaiynda tolyqqandy aqparattar berdi. Onda qoiylǵan týyndylardyń sapasy men kórkemdik ideiasy, balalar úshin tárbielik mańyzy da egjei-tegjeili sarapqa salynatyndyǵy aityldy.
Festival jeńimpazdary búgin Q.A.Iasaýi atyndaǵy HQTÝ-niń Mádeniet ortalyǵynda marapattalady dep kútilýde.
