Túrkistanda Qazaqstan halqy Assambleiasy men QR Prezidenti janyndaǵy «Qoǵamdyq kelisim» RMM-nyń uiymdastyrýymen óńirlik seminar ótýde.
Jiynda qazaqstandyq tatýlyq pen kelisim úlgisin ilgeriletý máseleleri sóz boldy, dep habarlaidy QazAqparat tilshisi.
Úsh kúndik seminarǵa Qazaqstan halqy Assambleiasy men birqatar ministrlikterdiń, QR Prezidenti janyndaǵy «Qoǵamdyq kelisim» RMM-nyń, «Nur Otan» partiiasynyń ókilderi, ǵalymdar, respýblikalyq qoǵamdyq uiymdardyń jetekshileri, oblystyq basqarmalar men aýyl ákimdikteriniń qyzmetkerleri jáne jastar qatysýda. Seminardyń ashylý saltanatyna Ońtústik Qazaqstan oblysy ákimi apparatynyń «Qoǵamdyq kelisim» KMM basshysy Erbol Baiqonaqov pen Q.A.Iasaýi atyndaǵy halyqaralyq qazaq-túrik ýniversitetiniń vitse-prezidenti Bahytjan Muhamedjanov, sondai-aq Túrkistan qalasy ákiminiń orynbasary Ǵani Rysbekov qatysyp, Memleket basshysynyń «Bolashaqqa baǵdar: rýhani jańǵyrý» baǵdarlamalyq maqalasynda aitylǵan ulttyq birgeilikti saqtaýdyń mańyzdylyǵyn sóz etti. Jiynda QR Prezidenti janyndaǵy «Qoǵamdyq kelisim» RMM atynan ýniversitet kitaphanasyna birqatar kitaptar tartý etildi.
Budan bólek, seminar barysynda QR Eńbek jáne halyqty áleýmettik qorǵaý ministrliginiń departament direktorynyń orynbasary E.Abýlhatin, QR Bilim jáne ǵylym ministrliginiń bas sarapshysy Q.Jahin, QR Prezidenti janyndaǵy «Qoǵamdyq kelisim» RMM qyzmetkerleri T.Marmontova, J.Úsipbekova, A.Nurlan, L. N. Gýmilev atyndaǵy Eýraziia ulttyq ýniversitetiniń professory, t.ǵ.k. Q.Darkenov jáne t.b ǵalymdar men qoǵam belsendileri «Qoǵamdyq sanany jańǵyrtý» baǵdarlamasyn júzege asyrý aiasynda qoǵamdyq kelisim men turaqtylyqty qamtamasyz etý máseleleri boiynsha dáris oqidy dep josparlanǵan.
