Túrkistanda «Ulttyq valiýta kúni» qarsańynda «Táýelsizdik nyshany - tól teńge» atty kórmeniń ashylý saltanaty ótti.
Qoja Ahmet Iasaýi kesenesinde uiymdastyrylǵan kórmege Otyrar qoryq-mýzeii men Názir Tórequlov mýzeii tarihi-mádeni etnografiialyq ortalyǵynyń qyzmetkerleri, qalalyq ardagerler keńesi men qazaq tili qoǵamynyń músheleri, sondai-aq mektep oqýshylary men ustazdar, qala turǵyndary men qonaqtary qatysty, dep habarlaidy "Ult aqparat".
«Áziret Sultan» memlekettik tarihi-mádeni qoryq-mýzeiiniń bastamasymen ótken shara Elbasy Nursultan Nazarbaevtyń «Bolashaqqa baǵdar: rýhani jańǵyrý» maqalasy aiasynda uiymdastyryldy.
«Táýelsizdik nyshany - tól teńge» kórmesi qazaq jerinde soǵylyp, ainalymda júrgen aqsha túrleri jəne 1993 jyly ainalymǵa jiberilgen teńge banknottary men monetalardyń úlgileri, teńgeniń evoliýtsiialyq damý barysyndaǵy úlgileri men Qazaqstan Ulttyq bankiniń kollektsiialyq teńgeleri syndy bes bólimnen turady.
San ǵasyrlyq tarihi kezeńderdi qamtityn kórmede qazaq jerinde meken etken túrki memleketteriniń aqsha túrleri tanystyryldy. Táýelsizdigimizdiń jarshysy bolǵan teńgelerdiń 1993 jylǵy alǵashqylarynan bastap, búgingi tańǵa deiingi damý tarihynan habar beretin úlgileri kópshilik nazaryna usynyldy. Máselen, qazirgi tańda álemdegi jalǵyz úlgisi ǵana belgili bolyp otyrǵan Shyńǵys han atymen Samarqanda soǵylǵan altyn dinar jəne búgingi tańǵa deiin belgisiz bolyp kelgen tyń jańalyq - Jáńgir han tusynda soǵylǵan mys aqsha da jurtshylyq nazaryna usynyldy. Ǵalymdar mýzei qorynda saqtalǵan, Samarqand aqsha saraiynda jasalǵan dinar qazirgi kúnde tipologiialyq turǵyda álemdegi jalǵyz aqsha dep otyr. Nýmizmatika tarihynda qazaq handary arasynda óz atynan aqsha soqtyrǵan tek Tursyn Muhammed hannyń teńgeleri ǵana belgili bolyp kelgen bolsa, Salqam Jáńgir hanǵa arnap jasalǵan teńgeniń tabylýy da aitarlyqtai jańalyqqa ie. Qazaq nýmizmatikasynyń tarihyna jańasha kózqaraspen qaraýǵa múmkindik beretin bul tiyn úlgisi óte sirek kezdesetin aqshalar qatarynan oryn alady.
Aita keteiik, «Áziret Sultan» qoryq-mýzeiiniń nýmizmatikalyq qorynda búgingi tańda 13 myńnan asa jádiger saqtaýly.
