Túrkistan qalasynda oryn alǵan qaiǵyly jaǵdaidyń sebebin anyqtaý úshin quzyrly organdardan qurylǵan top bolǵan jaitty jan-jaqty tekserip jatyr. Oryn alǵan oqiǵanyń mán-jaiyn anyqtaýmen ainalysatyn arnaiy komissiia shuǵyl brifing ótkizip, alǵashqy málimettermen bólisti, dep habarlaidy "Ult aqparat".
Jergilikti bilik ókilderi qaiǵy jamylǵan januiaǵa jan-jaqty kómek kórsetilip, demeýshiler tarapynan 7 mln teńge kóleminde materialdyq kómek berilietindigin jetkizdi. Belgili bolǵandai, oblystyq memlekettik qyzmetshiler kómek retinde bir kúndik jalaqylaryn aýdarýǵa niet bildirgen.
«Oryn alǵan qaiǵyly jaǵdai boiynsha qylmystyq is ashylyp, aldyn ala tergeý jumystary júrgizilýde. Tergeý nátijesinde, jaýapty tulǵalardyń kinási anyqtalatyn bolsa, zań aiasynda jaýapkershilikke tartylady. Qyzylorda oblysy Jańaqorǵan aýdanynda Túrkistan qalasynyń ákimi Rashid Aiýpov jáne basqa da qala ókilderi jerleý rásimine qatysty. Jerleýge bailanysty jáne basqa da materialdyq shyǵyndar tolyqtai óteletin bolady. Túrkistan oblysy ákimdigi tarapynan qaiǵyly jaǵdaiǵa ushyraǵan otbasyǵa qarjylai kómek kórsetiledi», – dedi oblys ákiminiń birinshi orynbasary Arman Jetpisbai.
Oqiǵa ornyna tótenshe jaǵdai, politsiia, gazǵa jaýapty qyzmetkerlerimen tekserý júrgizilgen. Tekserý barysynda úidiń 3 bólmeden turatyny, onda kamin túrindegi pesh (Iran peshi) ornatylǵany anyqtalǵan.
«Peshti muqiiat tekserý barysynda ornatylǵan peshke gofrlengen burǵysh qosylǵany anyqtaldy. Ol 1,5 metr qashyqtyqta qabyrǵadaǵy tesik arqyly kóshege shyǵarylǵan. Syrtqy jaǵynan gofrlengen rozetka 5-7 sm ǵana quraidy, osylaisha qatty jeldiń áserinen peshtegi tartylystyń nasharlaýyna yqpal etip ýly gaz bólme ishine taraýyna ákep soǵýy múmkin», – dedi oblystyq TJD basshysy Nurǵali Júnisov.
