Túrkistandaǵy qaiǵyly oqiǵanyń mán-jaiy belgili boldy, dep habarlaidy ult.kz.
Túrkistan oblysy Keles aýdanyndaǵy Oshaqty kanalynda qaiǵyly jaǵdai bolyp, bir úidiń eki balasy – 13 jastaǵy Dias pen 8 jastaǵy Iýsýfahmet kóz jumdy. Qutqarýshylar olardy bir táýlik boiy izdep, keiin eki balanyń da denesin sýdan tapqan.
Aldyn ala málimet boiynsha, oqiǵa balalardyń úlkenderdi qaraýsyz qalǵan sátinde bolǵan. Kópbalaly otbasynyń anasy Aigúl Tamasheva sol kúni tańǵy saǵat 05:00-de jumysqa ketken. Artynsha múmkindigi shekteýli ákesi de nápaqa tabý úshin úiden shyqqan. Úidegi balalarǵa úlken qyzy qaraǵanymen, ol anasyna dári-dármek aparý úshin syrtqa ketken kezde Dias pen Iýsýfahmet úiden shyǵyp ketken. Týystarynyń aitýynsha, aǵaiyndylar jaqyn mańdaǵy kanalǵa barǵan.
Kýágerlerdiń boljamynsha, aldymen kishisi sýǵa qulap ketken bolýy múmkin. Ony qutqarmaq bolǵan aǵasy da qatty aǵysqa túsip, ekeýi de sýdan shyǵa almaǵan. Resmi organdar bul nusqany ázirge rastaǵan joq.
Izdestirý jumystary táýlik boiy júrgizildi. Nátijesinde qutqarýshylar bir balanyń máiitin aýyl mańynan, al ekinshisiniń denesin aǵys alyp ketken shamamen bir shaqyrym jerden tapqan.
Aigúl Tamasheva jeti balanyń anasy. Bir kúnde eki birdei ulynan aiyrylǵan otbasy aýyr qaiǵyny bastan ótkerip otyr. Qazirgi ýaqytta oqiǵanyń naqty sebepteri anyqtalyp, tiisti organdar tekserý júrgizýde.
