Búgin Túrkistan qalasyndaǵy «Farab» ámbebap ǵylymi kitaphanasynyń kontsert zalynda oblystyq «Babadan qalǵan – asyl sóz» jas termeshiler baiqaýy ótti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Túrkistan oblystyq mádeniet basqarmasy men Oblystyq mádeniet jáne halyq shyǵarmashylyǵy ortalyǵy biylǵy «Balalar jylyna» orai Túrkistan qalasynda jyl basynan beri «Bal tańdai» oblystyq balalar óner festivalin uiymdastyryp keledi.
Jyr dodasyn Oblystyq mádeniet jáne halyq shyǵarmashylyǵy ortalyǵynyń direktory Meiirjan Aliakbarov ashyp berip, sharanyń mańyzdylyǵyna toqtady. Terme ónerin damytý kerektigin alǵa tartyp, osyndai saiystardy uiymdastyrý arqyly jas talant ieleri anyqtalatynyn jetkizdi. Sondai-aq qatysýshylarǵa sáttilik tiledi. «Babadan qalǵan – asyl sóz» oblystyq jas termeshiler baiqaýyna 8-16 jas aralyǵyndaǵy 14 úmitker qatysyp, óner kórsetti. Munda qatysýshylar ereje boiynsha eki shyǵarma, iaǵni ońtústiktiń maqymynan bir terme jáne erkin taqyrypta bir terme oryndady. Baiqaýdyń ádil qazylar quramynda Abylai Bórihanov, Rýslan Aqynbekov, Murat Jumanov bar.
Ádil qazylar sheshimimen bas júlde Túrkistan qalasynyń ónerpazy Berdaly Orynbasarǵa buiyrdy. Al Otyrar aýdanynan Joldybai Erzat I oryn iegeri, Sairam aýdanynan Nyshanbai Sultanmuhamed pen Tólebi aýdanynan Murat Nurǵisa II oryn iegeri, Arys qalasynan Abdrahman Arman men Túrkistan qalasynan Ospan Inabat III oryn iegeri atansa, Oblystyq mádeniet jáne halyq shyǵarmashylyǵy ortalyǵynyń arnaiy júldesi Túrkistan qalasynan Arabdin Áselge, Mailyqoja Sultanqoja atyndaǵy arnaiy júlde Túrkistan qalasynan Meraly Asylzatqa buiyrdy. Jeńimpazdarǵa arnaiy statýetka men diplom jáne qarjylai syilyq tabystady. Al jalpy baiqaýǵa qatysqan 14 qatysýshyǵa jaqynda ǵana Túrkistan oblystyq mádeniet basqarmasynyń qoldaýymen Túrkistan maqamdary negizinde jaryq kórgen «Tekti sózdiń tóresi» termeler jinaǵy men diplomdar berildi.
Aita keteiik, óner baiqaýynyń maqsaty – qazaq óneriniń jetistikterin nasihattap, onyń órkendeýine yqpal jasaý, balalar arasyndaǵy terme ónerin damytý, jas daryndy termeshilerdi anyqtap, olarǵa qoldaý kórsetý, sonymen qatar, ońtústik óńirde qalyptasqan ózindik dástúrli óner mektebin kópshilikke nasihattaý.
