Túrkistandaǵy «Kongress holl» kesheninde Qazaqstan Respýblikasy Mádeniet jáne sport ministrliginiń uiymdastyrýymen, «AMANAT» partiiasynyń qoldaýymen «Altyn dombyra» respýblikalyq aqyndar aitysy bastaldy, dep habarlaidy «Ult aqparat» oblys ákimdiginiń baspasóz qyzmetine silteme jasap.
Biylǵy sóz dodasy Ahmet Baitursynulynyń 150 jyldyǵyna arnaldy. Aitystyń ashylý saltanatynda «AMANAT» partiiasynyń tóraǵasy, Qazaqstan Respýblikasy Parlamenti Májilisiniń tóraǵasy Erlan Qoshanov quttyqtaý sóz sóilep, Ahmet Baitursynulynyń el tarihyndaǵy ornyna toqtalyp, qazaqtyń aitys óneriniń damýyna qoldaý kórsetý jalǵasatynyn jetkizdi.
«Kieli Túrkistan topyraǵynda alaman aitystyń shymyldyǵyn ashyp otyrmyz. «AMANAT» partiiasy rýhaniiat pen mádenietke jan-jaqty qamqorlyq jasap keledi. Sonyń bir aiǵaǵy – ultymyzdyń boitumaryna ainalǵan osy aitys. El Prezidenti Qasym-Jomart Toqaevtyń bastamasymen elimiz jańa dáýirge, ádiletti Qazaqstanǵa qadam basty. Qoǵam ózgerip jatyr. Osy oń ózgeristerdi bolashaqqa aqyndarymyz jetkizedi dep oilaimyn. Búgin oramdy oilardy, ataly sózderdi estimiz degen senimdemin», – dedi Erlan Qoshanov.
Túrkistan oblysynyń ákimi Darhan Satybaldy elimizdiń eń úzdik 18 aqynynyń Túrkistan tórinde bas qosqanyna qýanyshty ekenin atap ótti.
«Táýelsizdik kúni qarsańynda Túrkistan tórinde bastalǵan «Altyn dombyra» aitysyna qosh keldińizder. Jýyrda Memleket basshysy Qasym-Jomart Toqaev Túrkistan oblysyna jumys saparynda Túrkistanǵa erekshe mártebe berý jóninde usynysyn aitty. Sondyqtan «Altyn dombyranyń» Túrki jurtynyń rýhani tórinde ótýi – biz úshin zor mártebe ári zańdylyq. Ózderińizge belgili, osydan 4 jyldan astam ýaqyt buryn óziniń tarihi tuǵyryna qaita qonǵan Túrkistan qalasy jańarý men jańǵyrýdyń buryn-sońdy bolmaǵan jańa belesine kóterildi. Búgingi aitysymyz ult qairatkeri Ahmet Baitursynulynyń 150 jyldyq mereitoiyna arnalyp otyr. Aqyndarymyzǵa sáttilik, shabyt tileimin. Biz osyndai mádeni-rýhani is-sharalardy qabyldaýǵa árqashan daiynbyz», – dedi Darhan Satybaldy.
Biylǵy jyldyń basty dodasyna elimizdiń ár óńirinde jyl boiy ótken aitystarda jeńimpaz atanǵan tanymal aqyndar jinalǵan.
Aitysty Qazaqstannyń eńbek sińirgen qairatkeri, Qazaqstan Respýblikasy Parlamenti Májilisiniń depýtaty Amanjol Áltaev júrgizýde. Túrkistandyq óner súier qaýym men kórermender aqyndardy úlken qoshemetpen qarsy alyp, qoldaý kórsetip jatyr.
Aita keteiik, respýblikalyq «Altyn dombyra» aqyndar aitysy 2012 jyldan bastap uiymdastyrylyp keledi. Byltyr bul dodada túrkistandyq Bekarys Shoibekov jeńimpaz atanǵan bolatyn.
Túrkistan tórindegi aitys 2 kúnge jalǵasady.
