Túrkistanda Abaidyń 175 jyldyǵyna orai animatsiialyq filmder túsiriledi, dep habarlaidy "Ult aqparat" Óńirlik kommýnikatsiialar qyzmetine silteme jasap.
Túrkistan oblysy búginde teleserial men animatsiialyq filmderdiń ortalyǵyna ainalyp otyr. Buǵan deiin ańyz ári tarihi keiipkerlerdi pash etetin birneshe týyndyny kórermenge tartý etti.
Biyl da Ál-Farabidiń 1150 jyldyǵyna orai «Túrkistan qupiialary» derekti filmin jáne Abaidyń 175 jyldyǵy aiasynda animatsiialyq filmderdi túsirý josparlanyp otyr. Bul týraly Óńirlik kommýnikatsiialar qyzmetinde ótken brifingte oblystyq Mádeniet basqarmasy basshysynyń mindetin atqarýshy Ázimhan Qoilybaev málimdedi.
Aita keterligi, oblysta túsirilgen «Kúsh atasy − Qajymuqan», «Kieli Qazyǵurt», «Otyrardy qorǵaý» animatsiialyq filmderi men «Kóne jetigenniń syry» teleserialy oblystyń barlyq aýdandary men qalalarynda jáne jergilikti telearnalar men «Habar», «Asyl arna» telearnalarynan kórsetilgen bolatyn.
Búgingi tańda oblysta 679 mádeniet jáne óner mekemesi halyqqa qyzmet kórsetedi. Onyń ishinde: 389 kitaphana, 251 klýb, 24 murajai, 3 kásibi teatr, 6 saiabaq, 2 ortalyq, 1 oblystyq filarmoniia, 1 kórkemsýret galereiasy,1 «Ońtústikfilm» mekemesi bar.
«Ótken jyly oblystyq kásibi 3 teatrda 10 jańa qoiylym sahnalandy. Aǵymdaǵy jyly atalǵan teatrlarda 702 qoiylym halyqqa usynylyp, 22 gastroldik issapar uiymdastyryldy. Teatrlarda Ál-Farabidiń 1150, Abaidyń 175 jyldyq mereitoiyna orai jańa spektaklderiniń premerasy halyq nazaryna usynylmaq. Atalǵan mereitoilarǵa bailanysty sáýir aiynda «Teatr kóktemi-2020» kásibi teatrlardyń festivali men «Halyqtyq» ataǵy bar teatrlardyń baiqaýy ótedi. Sonymen qatar, Otyrar aýdanynda «Open air» ashyq aspan astyndaǵy teatry iske qosylyp, tarihi kórkem, animatsiialyq filmder kórsetilip, qarasha aiyna deiin halyqqa qyzmet kórsetetin bolady», - dedi basqarma basshysy.
Sondai-aq, oblystaǵy 389 kitaphanada 17 125 kópshilik is-shara uiymdastyrylǵan. Kitaphanalar 110 641 dana jańa kitappen tolyqtyrylyp, Jalpy kitap qory 5 mln 768 myń danadan asyp otyr. «Eń kóp oqylatyn 100 kitap», «Altyn qorǵa úles qos», «Kitaphanaǵa syi» aktsiialary uiymdastyrylyp 13 043 dana kitap kitaphanalardyń qoryna syiǵa berilgen.
Budan ózge, biyl atalyp ótkeli otyrǵan kompozitor Sh.Qaldaiaqovtyń 90 jyldyǵyna orai «Baqyt qushaǵynda» atty retro-festivali, «Án erkesi» merekelik kontserti, «Meniń Qazaqstanym» oblystyq án baiqaýy jáne barlyq aýdan, qalalarda 80-ge jýyq is-shara ótkizý josparlanýda.
