Túrkistan qalasynda 200 tósek-orynǵa laiyqtalǵan modýldi juqpaly aýrýlar aýrýhanasynyń qurylysy júrip jatyr, dep habarlaidy oblystyq ákimdiktiń baspasóz qyzmeti.
Biyl elimizde 13 modýldi infektsiialyq statsionar salynýy josparlanǵan bolsa, sonyń biri Túrkistan shaharynda.
Aita keterligi, 200 tósek-orynnyń 180-i infektsiialyq juqpaly aýrýlarǵa, al 20 oryn reanimatsiialyq aýrýlarǵa arnalǵan. Aýrýhanada tsifrly rentgen apparaty, ýltradybystyq apparattar jáne ózge de ozyq úlgidegi tehnikalar emdelýshilerge qyzmet etetin bolady.
Nysannyń qurylysy josparlanǵan aimaqta barlyq qajetti injenerlik jeliler men kólik infraqurylymy bar. Jalpy, infektsiialyq statsionardyń qurylys jumystary qarasha aiynda aiaqtalatyn bolady.
