Túrkistan oblysynda shetelge 200 milliard teńgege jýyq qarajatty zańsyz shyǵarýmen, kontrabandamen, bopsalaýmen jáne jemqorlyqpen bailanysty birneshe qylmystyq shema áshkerelendi, dep habarlaidy ult.kz.
Oblystyq prokýratýranyń málimetinshe, Túrkistan oblysy boiynsha Ekonomikalyq tergep-tekserý departamenti jalǵan kásiporyndardy paidalaný arqyly Qazaqstannan shetelge shamamen 200 milliard teńgeniń zańsyz aýdarylǵanyn anyqtaǵan.
Atalǵan derek boiynsha Qylmystyq kodekstiń 235-1-baby 3-bóligi («Qazaqstan Respýblikasynan valiýtalyq qundylyqtardy zańsyz áketý, joldaý jáne aýdarý») boiynsha sotqa deiingi tergep-tekserý bastaldy.
Sonymen qatar quqyq qorǵaý organdary Qyrǵyzstannan temeki ónimderin zańsyz tasymaldaǵan kontrabandalyq arnanyń qyzmetin toqtatty. Tergeý málimetine sáikes, temeki ónimderi Túrkistan oblysyna zańsyz jetkizilip, keiin óńirde jáne Qazaqstannyń batys aimaqtarynda satylǵan.
Jedel is-sharalar barysynda 103 million teńgeniń temeki ónimi tárkilendi. Bul derek boiynsha Qylmystyq kodekstiń 214-baby («Zańsyz kásipkerlik») negizinde tergeý júrgizilip jatyr.
Budan bólek, shekara mańynda júk kóligi júrgizýshilerinen júieli túrde aqsha bopsalap kelgen qylmystyq toptyń áreketi áshkerelendi. Prokýratýranyń málimetinshe, tergeý barysynda zańsyz deldaldyq arqyly alynǵan qarajattyń bir bóligi memlekettik organnyń laýazymdy tulǵalaryna para retinde berilip otyrǵany anyqtalǵan.
Qazirgi ýaqytta osy fakti boiynsha sotqa deiingi tergeý jalǵasýda. Qylmystyq shemaǵa qatysy bar 23 adamnyń jeke basy anyqtalyp, olardyń beseýi sot sanktsiiasymen qamaýǵa alyndy.
